ۆەنەسۋەلا پرەزيدەنتىنىڭ مىندەتىن اتقارۋشى دەلسي رودريگەس كاراكاستا اقش جۇرگىزگەن وپەراتسيا كەزىندە قازا تاپقان اسكەري قىزمەتكەرلەردى ەسكە الۋ ماقساتىندا جەتى كۇندىك ازا تۇتۋ جاريالادى، دەپ حابارلايدى «ادىرنا» ءتىلشىسى.
«پرەزيدەنت نيكولاس مادۋرونى قورعاۋ كەزىندە قازا تاپقان جاس ازاماتتاردىڭ قۇرمەتىنە جەتى كۇندىك ازا تۇتۋ جاريالاۋ تۋرالى شەشىم قابىلدادىم. بۇل – ولارعا دەگەن ءبىزدىڭ تاعزىمىمىز»، – دەدى ول.
اقش 3 قاڭتار كۇنى كاراكاستا اسكەري وپەراتسيا جۇرگىزىپ، نيكولاس مادۋرو مەن ونىڭ جۇبايى سيليا فلورەستى نيۋ-يورككە الىپ كەتكەن ەدى. سوت ۆەنەسۋەلالىق ساياساتكەرگە «ناركوتەرروريزم» ايىبىن تاققان. مادۋرو وزىنە تاعىلعان ايىپتى مويىندامادى.
ۆەنەسۋەلا قورعانىس ءمينيسترى ۆلاديمير پادرينو لوپەستىڭ ايتۋىنشا، پرەزيدەنت رەزيدەنتسياسىن باسىپ الۋ كەزىندە امەريكالىق ارنايى جاساق وكىلدەرى مەملەكەت باسشىسىنىڭ كۇزەتشىلەرىن ءولتىرىپ كەتكەن.
ۆەنەسۋەلا ۇكىمەتى امەريكالىق وپەراتسيا سالدارىنان قازا تاپقانداردىڭ جالپى سانىن رەسمي تۇردە جاريالاعان جوق. اسكەريلەردىڭ مالىمەتىنشە، ۆەنەسۋەلا تاراپىنان 23 ادام قازا تاپقان. ال كۋبا بيلىگى مادۋرونىڭ قاۋىپسىزدىك توبىنا كىرگەن 32 ازاماتتىڭ كوز جۇمعانىن حابارلادى. 4 قاڭتار كۇنى The New York Times باسىلىمى ۆەنەسۋەلالىق جوعارى لاۋازىمدى شەنەۋنىككە سىلتەمە جاساپ، قازا تاپقاندار سانى كەمىندە 40 ادامعا جەتكەنىن جازدى.
