5 قاڭتار كۇنى ازەربايجان پرەزيدەنتى يلحام اليەۆ جەرگىلىكتى تەلەارنالارعا بەرگەن سۇحباتىندا انا ءتىلىن قورعاۋدىڭ ماڭىزىن اتاپ ءوتتى، دەپ حابارلايدى "ادىرنا" ۇلتتىق پورتالى Report-قا سىلتەپ.
مەملەكەت باسشىسى وتارشىلدىق جىلدارىندا ازەربايجان حالقى ءوز ءتىلىن ساقتاپ قالىپ، ونى ۇرپاقتان ۇرپاققا امانات ەتىپ جەتكىزگەنىن ەسكە سالدى. وسى ورايدا ول قازىرگى كەزەڭدە دە انا ءتىلدى ساقتاۋ ءار ازاماتتىڭ مىندەتى ەكەنىن ايتتى.
يلحام اليەۆتىڭ سوزىنشە، بىرنەشە ءتىلدى ءبىلۋ – قۇپتارلىق جايت، الايدا شەتەل تىلدەرىن تەك قاجەتتى جاعدايدا عانا قولدانۋ كەرەك. ونىڭ ايتۋىنشا، شەت تىلىنەن ەنگەن سوزدەر ءتىلدى بايىتپايدى، كەرىسىنشە ۇلتتىق بولمىستى بىرتىندەپ السىرەتەدى.
«شەتەل سوزدەرى ءتىلدى بۇزادى، بايىتپايدى جانە ۇلتتىق بىرەگەيلىكتى تامشىلاپ، بايقالماي جويادى. ەگەر ءتىل جوعالسا نەمەسە بۇزىلسا، ۇلتتىق بىرەگەيلىك تە جويىلادى. ال ونىڭ سوڭى مەملەكەتتىلىككە قاۋىپ ءتوندىرۋى مۇمكىن»، – دەدى ازەربايجان پرەزيدەنتى.
سونداي-اق، ازەربايجان پرەزيدەنتى سۇحباتىندا يلحام اليەۆ تۇركى مەملەكەتتەرى ۇيىمىنىڭ گابالاداعى سامميتىندە ايتقان باستاماسىن ەسكە الىپ، ۇيىمعا مۇشە ەلدەردىڭ بىرلەسكەن اسكەري جاتتىعۋلارىن ەل اۋماعىندا وتكىزۋ قاجەت ەكەنىن مالىمدەدى.
مەملەكەت باسشىسىنىڭ ايتۋىنشا، قازىرگى تاڭدا تۇركى مەملەكەتتەرىمەن اسكەري جاتتىعۋلار كوبىنە ەكىجاقتى فورماتتا وتكىزىلىپ كەلەدى. بۇل باعىتتا تۇركيامەن ىنتىماقتاستىق ەرەكشە بەلسەندى بولعانىمەن، باسقا مۇشە ەلدەرمەن دە بىرلەسكەن شارالار جۇزەگە اسىرىلۋدا.
«الايدا ورتاق اسكەري جاتتىعۋلاردىڭ سيمۆولدىق ماڭىزى وتە زور. سونىمەن قاتار مۇنىڭ ناقتى پراكتيكالىق قاجەتتىلىگى دە بار»، – دەدى يلحام اليەۆ.
سونداي-اق ازەربايجان پرەزيدەنتى سۇحبات بارىسىندا قازىرگى الەمدىك ساياساتتا حالىقارالىق قۇقىق ۇعىمىنىڭ السىرەگەنىن اتاپ ءوتتى. ونىڭ پىكىرىنشە، بۇگىندە باستى ءرولدى كۇش، ىنتىماقتاستىق، وداقتاستىق جانە ءوزارا قولداۋ اتقارادى.
