АҚШ президенті Дональд Трамп Колумбия президенті Густаво Петроны кокаин өндірумен айналысады деп айыптап, оған қарсы операция жүргізу мүмкіндігін жоққа шығармады, деп хабарлайды «Адырна» тілшісі РИА Новостиге сілтеме жасап.
«Колумбия да өте ауыр жағдайда отыр. Оны кокаин өндіруді және өнімді АҚШ-қа сатуды ұнататын «ауру адам» басқаруда. Оның кокаин зауыттары мен фабрикалары бар. Бұл ұзаққа созылмайды, АҚШ тарапынан операция болады», – деді Трамп журналистерге.
Бұған жауап ретінде Колумбия президенті Густаво Петро Трампты өзіне қатысты жала жабатын айыптауларды тоқтатуға шақырды. Оның айтуынша, Колумбия әділет органдарының ондаған жыл бойы есірткі картельдеріне қарсы жүргізген күресі барысында оның есімі бірде-бір сот материалында аталмаған.
«Трамптың білімсіздіктен туындаған мәлімдемелерін үзілді-кесілді жоққа шығарамын. Соңғы 50 жыл ішінде менің атым есірткі саудасына қатысты бірде-бір сот ісінде болған емес, Маған жала жаппаңыз, Трамп мырза», – деп жазды Петро Х әлеуметтік желісінде.
Петро Колумбияның сот жүйесі атқарушы биліктен тәуелсіз екенін және көп жағдайда оның саяси қарсыластарының бақылауында екенін атап өтті. Айтуынша, өңірдегі ең ірі есірткі саудагерлерінің қызметіне қатысты барлық материал Колумбия соттарының ашық мұрағаттарында сақтаулы.
«Сіз Колумбия тарихын оқымайсыз, сондықтан сын-пікірлеріңіз сәтсіздікке ұшырап отыр. Колумбиядағы есірткі қылмыстарын тергеумен айналысатын өз офицерлеріңізбен, сарапшылармен кездескеніңіз жөн болар еді. Мен оларға солшыл сенатор болған кезімде өз тергеулерім арқылы көмектескенмін. Демократия мен бостандық үшін шынайы күрескерлер ғана бар жерде есірткі саудагерлерін іздемеңіз», – деп түйіндеді Колумбия басшысы.
