3 قاڭتار كۇنى اقش-تىڭ ۆەنەسۋەلانىڭ استاناسى كاراكاسقا جاساعان سوققىسىنىڭ سالدارىنان اسكەري قىزمەتكەرلەر مەن بەيبىت تۇرعىنداردى قوسا العاندا، كەمىندە 40 ادام قازا تاپقان. بۇل تۋرالى ۆەنەسۋەلانىڭ جوعارى لاۋازىمدى شەنەۋنىگىنە سىلتەمە جاساعان The New York Times باسىلىمىنىڭ جازدى، دەپ حابارلايدى "ادىرنا".
دەرەككوزدىڭ ايتۋىنشا، اقش-تىڭ سول كۇنگى ارەكەتتەرى ەل ىشىندە ايتارلىقتاي ادام شىعىنىنا اكەلگەن، ياعني «اسكەري قىزمەتكەرلەر مەن بەيبىت ازاماتتاردى قوسا العاندا، كەمىندە 40 ادام كوز جۇمعان».
اقش پرەزيدەنتى دونالد ترامپ ۆەنەسۋەلا اۋماعىندا اۋقىمدى اسكەري سوققىلار جاسالعانىن مالىمدەپ، ەل پرەزيدەنتى نيكولاس مادۋرو مەن ونىڭ جۇبايى سيليا فلورەستىڭ ۇستالىپ، ۆەنەسۋەلادان شىعارىلعانىن ايتتى.
حابارلامادا اقش بيلىگى نيكولاس مادۋرو مەن ونىڭ جۇبايىنا ناركوتەرروريزمگە قاتىستى بىرقاتار ايىپتار تاققانىن، سونىڭ ىشىندە كوكاين تاسىمالداۋ، قارۋ-جاراق پەن جارىلعىش زاتتاردى ساقتاۋ جانە اقش-قا قارسى ارەكەتتەردى ۇيىمداستىرۋعا ءسوز بايلاسۋ كۇدىگى بار ەكەنىن اتاپ ءوتتى.
ال ۇلىبريتانيا پرەمەر-ءمينيسترى كير ستارمەر ءوز ەلىنىڭ اقش-تىڭ ۆەنەسۋەلاداعى اسكەري وپەراتسياسىنا قاتىسى جوق ەكەنىن مالىمدەدى.
اسكەري وپەراتسيادان كەيىن دونالد ترامپ اقش ۆەنەسۋەلانى باقىلاۋعا الاتىنىن ايتقان. بۇعان جاۋاپ رەتىندە ۆەنەسۋەلا ۆيتسە-پرەزيدەنتى دەلسي رودريگەس نيكولاس مادۋرونى دەرەۋ بوساتۋدى تالاپ ەتىپ، «ۆەنەسۋەلا ەشبىر ەلدىڭ وتارى بولمايدى» دەپ مالىمدەدى.
قازىرگى ۋاقىتتا نيكولاس مادۋرو مەن ونىڭ جۇبايى ارنايى ۇشاقپەن اقش-تىڭ نيۋ-يورك شتاتىنا جەتكىزىلىپ، ۋاقىتشا تەرگەۋ يزولياتورىنا قامالعانى حابارلانۋدا.
