Иранда экономикалық наразылықтардың жалғасуына байланысты елдің ресми өкілдері АҚШ-қа қатал ескерту жасап, кез келген сыртқы араласуды ұлттық қауіпсіздікке төнген қауіп ретінде бағалайтындарын мәлімдеді, деп хабарлайды “Адырна”.
Иранның рухани көшбасшысының ұлттық қауіпсіздік мәселелері жөніндегі кеңесшісі Әли Шамхани жұма күні Иранның қауіпсіздігі "қызыл сызық" екенін айтып, кез келген араласуға қатаң жауап қайтарылатынын ескертті.
Бұл мәлімдеме АҚШ президенті Дональд Трамптың Ирандағы наразылық білдірушілерді қолдау туралы айтқан сөздеріне жауап ретінде жасалды.
Шамхани X әлеуметтік желісінде жариялаған жазбасында, Иранның қауіпсіздігіне араласу әрекеттеріне дереу тойтарыс берілетінін атап өтті. Ол сондай-ақ Иран халқы АҚШ-тың "құтқару" әрекеттерінің салдарын жақсы білетінін айтты. Оның пікірінше, Ирак пен Ауғанстандағы, сондай-ақ Газа секторындағы мысалдар АҚШ-тың мұндай араласулары өңірдегі тұрақсыздық пен бейберекетсіздікке әкеп соғатынын көрсеткен.
Иранның басқа да ресми тұлғалары осыған ұқсас пікірлерін білдірді. Мысалы, Иранның Ұлттық қауіпсіздік жөніндегі жоғары кеңесінің хатшысы Әли Лариджани АҚШ пен Израильді Ирандағы наразылықтарды өршітуге айыптап, Иранның ішкі істеріне араласу АҚШ-тың Таяу Шығыстағы мүдделеріне зиян келтіруі мүмкін екенін айтты.
Лариджанидің айтуынша, АҚШ-тың Иранның ішкі мәселелеріне араласуы бүкіл өңірде тұрақсыздық туғызып, америкалық мүдделердің күйреуіне әкелуі ықтимал.
Иранның Сыртқы істер министрлігінің ресми өкілі Эсмаил Багаи иран халқы ел ішіндегі мәселелерді шешуге шетелдік араласуға жол бермейтінін айтты. Ол 1953 жылғы төңкеріс, Иран-Ирак соғысы кезінде Иракты қолдау, 1988 жылы ирандық жолаушылар ұшағының атып түсірілуі, сондай-ақ санкциялық қысым мен 2025 жылы Иран инфрақұрылымына жасалған соққыларды мысалға келтіріп, мұндай әрекеттердің халықаралық құқықты өрескел бұзу екенін атап өтті.
Ирандағы экономикалық наразылықтар бірнеше күн бойы жалғасып келеді. Наразылықтардың басты себебі — ұлттық валютаның құнсыздануы мен бағаның өсуі. Ел үкіметі диалогқа дайын екендігін айтқанымен, шерушілердің әзірге бітімге келер түрі байқалмайды.
