ەلىمىزدە قۇنى 103 ملرد تەڭگە بولاتىن تولىق تسيكلدى بيوفارماتسەۆتيكالىق كەشەن سالىنادى. بۇل تۋرالى بۇگىن، 1 قاڭتاردا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«پرەزيدەنتتىڭ فارماتسەۆتيكا سالاسىنداعى وتاندىق ءوندىرىستىڭ ۇلەسىن 50%-عا جەتكىزۋ جونىندەگى تاپسىرمالارىن ورىنداۋ شەڭبەرىندە قازاقستاندا ءىرى ستراتەگيالىق ينۆەستيتسيالىق جوبا جۇزەگە اسىرىلادى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى. قۇجاتتا قر دەنساۋلىق ساقتاۋ مينيسترلىگى مەن «Khan Tengri Biopharma» جشس اراسىنداعى «الاتاۋ» ارنايى ەكونوميكالىق ايماعىندا زاماناۋي «بيوفارماتسەۆتيكالىق تولىق تسيكلدى كەشەن سالۋ» جونىندەگى ينۆەستيتسيالار تۋرالى كەلىسىم جوباسى ماقۇلداندى»،- دەلىنۇگەن حابارلامادا.
نىسان دارىلىك زاتتار ءوندىرىسىنىڭ وزىق تەحنولوگيالارىمەن جابدىقتالادى دەپ جوسپارلانۋدا. نەگىزگى ماقسات – 58 پرەپارات ءتۇرىن شىعاراتىن ءوندىرىس قۋاتىن قۇرۋ. تولىق تسيكلدى ىسكە قوسۋعا، ونىڭ ىشىندە بەلسەندى فارماتسەۆتيكالىق ينگرەديەنتتەر وندىرۋگە ەرەكشە نازار اۋدارىلادى.
كەشەننىڭ وندىرىستىك پورتفەلىنە 27 حالىقارالىق پاتەنتتەلمەگەن اتاۋى بار، سونىڭ ىشىندە ونكولوگيالىق، اۋتويممۋندى، سيرەك جانە قابىنۋ اۋرۋلارىن ەمدەۋگە ارنالعان پرەپاراتتار كىرەدى.
ينۆەستيتسيالاردىڭ جالپى كولەمى 103 ملرد تەڭگەدەن اسادى. كەشەندە 180-نەن استام جاڭا تۇراقتى جۇمىس ورنى اشىلادى.
جوبانى جۇزەگە اسىرۋ ەلىمىزدىڭ فارماتسەۆتيكا سالاسىن دامىتۋدا ستراتەگيالىق ماڭىزعا يە جانە لوكاليزاتسيانى كەڭەيتۋگە، ورنىقتى وندىرىستىك بازانى قالىپتاستىرۋعا، سونداي-اق الەۋمەتتىك ماڭىزى بار پرەپاراتتاردىڭ يمپورتىن كەزەڭ-كەزەڭىمەن الماستىرۋعا باعىتتالعان. ودان بولەك، شىعارىلاتىن ءونىمنىڭ ءبىر بولىگىن ەاەو، تمد ەلدەرىنىڭ، سونداي-اق تاياۋ شىعىس مەملەكەتتەرىنىڭ نارىقتارىنا ەكسپورتتاۋ جوسپارلانىپ وتىر.
