ميۋنحەننەن بەيجىڭگە بارا جاتقان Lufthansa ۇشاعى بورتتاعى توتەنشە جاعدايعا بايلانىستى الماتىعا شۇعىل قوندى – رەيستە جولاۋشى كوز جۇمعان. قازاقستاننىڭ اۆياتسيا اكىمشىلىگى جاعدايعا قاتىستى تۇسىنىك بەردى، دەپ حابارلايدى "ادىرنا".
ءباسپاسوز قىزمەتىنىڭ مالىمەتىنشە، 26 جەلتوقساندا ميۋنحەننەن بەيجىڭگە باعىت العان Lufthansa كومپانياسىنىڭ LH 0722 رەيسىمەن ۇشىپ بارا جاتقان جولاۋشى ءوزىن جايسىز سەزىنىپ، ەسىنەن تانىپ قالعان.
"ەكيپاج مۇشەلەرى الماتى حالىقارالىق اۋەجايىنا شۇعىل قونۋعا شەشىم قابىلدادى. اۋەجايدىڭ مەديتسينالىق قىزمەتى مەن قالالىق جەدەل جاردەم بريگاداسى ۇشاققا تەز ارادا جىبەرىلدى", - دەلىنگەن حابارلامادا.
كەلىپ جەتكەن مەديتسينا قىزمەتكەرلەرى جولاۋشىنىڭ ۇشۋ كەزىندە كوز جۇمعانىن انىقتادى.
ۇشاق الماتىدا جانارماي قۇيىپ الىپ، ساعات 7:56-دا باراتىن اۋەجايىنا ۇشىپ كەتتى.
