2025 جىل «الاتاۋ» ءداستۇرلى ونەر تەاترى ءۇشىن شىعارماشىلىق ورلەۋ جىلى بولدى. تەاتر ۇلتتىق ونەردى جاڭعىرتۋ، قازاق مادەنيەتىن كەڭىنەن ناسيحاتتاۋ جانە حالىقارالىق ساحنالاردا تانىتۋ باعىتىندا اۋقىمدى جۇمىستار اتقاردى.
بيىلعى جىلى تەاتر ءبىرجان سال شىعارماشىلىعىنان سىر شەرتەتىن «تەمىرتاس» رەكۆيەمىن ساحنالاپ، كورەرمەنگە قازاق ءان ونەرىنىڭ بايلىعىن كورسەتتى. قويىلىمدا دومبىرا مەن ءداستۇرلى اسپاپتاردىڭ سۇيەمەلدەۋىمەن ۇلتتىق فيلوسوفيا مەن مادەنيەت تەرەڭ اشىلدى.
تەاتردىڭ گاسترولدىك ساپارلارى ەلىمىزدىڭ وڭىرلەرىندە، سونىڭ ىشىندە الماتى، جەتىسۋ، تۇركىستان، قىزىلوردا، جامبىل، اباي جانە شىعىس قازاقستان وبلىستارى مەن شىمكەنت قالاسىندا ءوتتى. بارلىعى 42 قويىلىم كورسەتىلىپ، ءار وڭىردەگى كورەرمەندەر تەاتر ونەرىنە ەرەكشە قىزىعۋشىلىق تانىتتى. بالالارعا ارنالعان «اگۋگاي مەن يگيگاي» ەرتەگىلىك قويىلىمى جاس كورەرمەندەردىڭ ەرەكشە ىقىلاسىنا يە بولدى.
حالىقارالىق ساحنادا تەاتردىڭ «Mamluk. سۇلتان بەيبارىس» سپەكتاكلى تمد ەلدەرىنىڭ V جاستار تەاتر فورۋمىندا جانە ا.پ. چەحوۆ اتىنداعى XVII حالىقارالىق تەاتر فەستيۆالىندە كورسەتىلدى. سونىمەن قاتار، «Steppes Rhapsody» قويىلىمى فرانتسياداعى «اۆينون OFF» فەستيۆالىندە ساحنالانىپ، قازاق مادەنيەتىن الەمدىك قاۋىمعا پاش ەتتى.
جىل قورىتىندىسىندا تەاتر قىزمەتكەرلەرىنىڭ ەڭبەگى جوعارى باعالاندى. مادەنيەت قىزمەتكەرلەرى كۇنىنە وراي بىرنەشە قىزمەتكەر پرەزيدەنت پەن قالا اكىمىنىڭ ناگرادالارىمەن ماراپاتتالدى. سونىمەن قاتار، تەاتردىڭ «تەمىرتاس» سپەكتاكلى قازاقستان تەاتر سىنشىلارى بىرلەستىگىنىڭ VII «سىنشىلار جۇلدەسى – 2025» بايقاۋىندا «دراما سپەكتاكلىنىڭ جىل حورەوگرافى» نوميناتسياسىن جەڭىپ الدى.
تەاتر جانىنداعى ەتنو-فولكلورلىق جانە ۆوكالدى-اسپاپتى انسامبلدەر ەلىمىزدىڭ ءتۇرلى وڭىرلەرىندە جانە شيپاجايلاردا كونتسەرتتەر بەرىپ، حالىققا مادەني دەمالىس ۇيىمداستىردى. سونداي-اق، مۇگەدەك جاندار مەن ەستۋ قابىلەتى شەكتەۋلى ازاماتتار ءۇشىن حالىقارالىق فەستيۆالدەرگە قاتىسۋ ارقىلى تالانتتاردى انىقتاۋ مەن قولداۋعا ۇلەس قوستى.
2025 جىلى تەاتر جاڭا شىعارماشىلىق باستامالاردى قولعا الىپ، مەيرام ءحابيبۋلليننىڭ رەجيسسەرلىگىمەن «قايران اباي» سپەكتاكلى دايىندالىپ، كورەرمەنگە جول تارتۋعا دايىندالدى.
ورتالىق ازياداعى جالعىز ءداستۇرلى ونەر تەاترى رەتىندە «الاتاۋ» الداعى ۋاقىتتا دا ۇلتتىق ونەردى الەمگە تانىتىپ، رۋحاني جاڭعىرۋدىڭ جارقىن ۇلگىسى بولۋدى جالعاستىرادى.
