الماتى وبلىسىندا ىلە اۋدانىنىڭ بۇرىنعى اكىمى باعدات قاراساەۆقا قاتىستى رەزونانستى قىلمىستىق ءىس بويىنشا سوت ۇكىمى شىقتى. ءىس بىرنەشە جىلعا سوزىلعان تەرگەۋ ناتيجەسىندە قارالىپ، ەكس-شەنەۋنىك بىرقاتار اۋىر ايىپتار بويىنشا جاۋاپقا تارتىلدى، دەپ حابارلايدى "ادىرنا".
باعدات قاراساەۆ ءار جىلدارى تالدىقورعان قالاسىنىڭ اكىمى جانە ىلە اۋدانىنىڭ اكىمى قىزمەتتەرىن اتقارعان. تەرگەۋ نۇسقاسىنا سايكەس، ول وسى لاۋازىمداردا جۇرگەن كەزىندە قىزمەتتىك وكىلەتتىكتەرىن جەكە جانە اففيليرلەنگەن قۇرىلىمداردىڭ مۇددەسىنە پايدالانعان.
تالدىقورعان قالاسىندا اكىم بولعان كەزەڭدە قاراساەۆ ينۆەستيتسيالىق جوبا سىلتاۋىمەن قوقىس وڭدەۋ زاۋىتىنا ارنالعان جەر تەلىمىن جەكە كومپانياعا ۋاقىتشا ءارى وتەۋسىز پايدالانۋعا بەرگەن. الايدا جوبا تولىق ىسكە اسىرىلماي، سوعان قاراماستان جەر تەلىمى زاڭ تالاپتارىن بۇزا وتىرىپ كومپانيانىڭ جەكە مەنشىگىنە تەگىن بەرىلگەن. كەيىن بۇل شەشىم سوت ارقىلى زاڭسىز دەپ تانىلىپ، جەر مەملەكەت مەنشىگىنە قايتارىلدى. مەملەكەتكە كەلتىرىلگەن شىعىن شامامەن 4 ميلليون تەڭگە دەپ باعالاندى.
ىلە اۋدانىنىڭ اكىمى قىزمەتىن اتقارعان كەزىندە قاراساەۆتىڭ قوقىس پوليگونىنا بايلانىستى بيزنەسكە زاڭسىز ارالاسقانى انىقتالدى. تەرگەۋ دەرەكتەرىنە سۇيەنسەك، ول سەنىمدى تۇلعالار ارقىلى قوقىس قالدىقتارىن باسقارۋمەن اينالىساتىن كومپانيانى باقىلاپ وتىرعان.
اتالعان كومپانياعا پوليگون ماڭىنان جەر ءبولىنىپ، قاتتى تۇرمىستىق قالدىقتار پوليگونى 7 جىلعا سەنىمگەرلىك باسقارۋعا بەرىلگەن. تەندەر بارىسىندا باسەكەلەستىك بولماعان، ال كەلىسىمشارتتان مەملەكەتتىڭ مۇددەسىن قورعايتىن ماڭىزدى تالاپتار الىنىپ تاستالعان.
كومپانيا ەكولوگيالىق تالاپتاردى ساقتاماعان، جۇمىس ورىندارىن قۇرماعان جانە پايدادان مەملەكەتكە تيەسىلى ۇلەستى اۋدارماعان. تەرگەۋ دەرەگىنشە، تۇسكەن قاراجات قولما-قول شەشىلىپ، جاسىرىن تۇردە تاراتىلعان. سونىمەن قاتار، ەكس-اكىم كەلىسىمشارتتىڭ ۋاقىتىن ارتقا قاراي شامالاپ، ۇزاق مەرزىمگە ۇزارتۋعا تىرىسقان.
سوت باعدات قاراساەۆتى ءبىر ەپيزود بويىنشا اقتاعانىمەن، قىزمەتتىك وكىلەتتىكتەردى تەرىس پايدالانۋ جانە كاسىپكەرلىك قىزمەتكە زاڭسىز قاتىسۋ باپتارى بويىنشا كىنالى دەپ تانىدى. ناتيجەسىندە ول 3 جىل 3 ايعا باس بوستاندىعىنان ايىرىلدى. جازاسىن ەڭ تومەنگى قاۋىپسىزدىك دەڭگەيىندەگى مەكەمەدە وتەيدى.
سونىمەن قاتار، سوت مەملەكەت باسشىسىنا قاراساەۆتى «پاراسات» جانە «قۇرمەت» وردەندەرىنەن ايىرۋ تۋرالى ۇسىنىس ەنگىزۋ جونىندە شەشىم قابىلدادى.
