Алматы облысында Іле ауданының бұрынғы әкімі Бағдат Қарасаевқа қатысты резонансты қылмыстық іс бойынша сот үкімі шықты. Іс бірнеше жылға созылған тергеу нәтижесінде қаралып, экс-шенеунік бірқатар ауыр айыптар бойынша жауапқа тартылды, деп хабарлайды "Адырна".
Бағдат Қарасаев әр жылдары Талдықорған қаласының әкімі және Іле ауданының әкімі қызметтерін атқарған. Тергеу нұсқасына сәйкес, ол осы лауазымдарда жүрген кезінде қызметтік өкілеттіктерін жеке және аффилирленген құрылымдардың мүддесіне пайдаланған.
Талдықорған қаласында әкім болған кезеңде Қарасаев инвестициялық жоба сылтауымен қоқыс өңдеу зауытына арналған жер телімін жеке компанияға уақытша әрі өтеусіз пайдалануға берген. Алайда жоба толық іске асырылмай, соған қарамастан жер телімі заң талаптарын бұза отырып компанияның жеке меншігіне тегін берілген. Кейін бұл шешім сот арқылы заңсыз деп танылып, жер мемлекет меншігіне қайтарылды. Мемлекетке келтірілген шығын шамамен 4 миллион теңге деп бағаланды.
Іле ауданының әкімі қызметін атқарған кезінде Қарасаевтың қоқыс полигонына байланысты бизнеске заңсыз араласқаны анықталды. Тергеу деректеріне сүйенсек, ол сенімді тұлғалар арқылы қоқыс қалдықтарын басқарумен айналысатын компанияны бақылап отырған.
Аталған компанияға полигон маңынан жер бөлініп, қатты тұрмыстық қалдықтар полигоны 7 жылға сенімгерлік басқаруға берілген. Тендер барысында бәсекелестік болмаған, ал келісімшарттан мемлекеттің мүддесін қорғайтын маңызды талаптар алынып тасталған.
Компания экологиялық талаптарды сақтамаған, жұмыс орындарын құрмаған және пайдадан мемлекетке тиесілі үлесті аудармаған. Тергеу дерегінше, түскен қаражат қолма-қол шешіліп, жасырын түрде таратылған. Сонымен қатар, экс-әкім келісімшарттың уақытын артқа қарай шамалап, ұзақ мерзімге ұзартуға тырысқан.
Сот Бағдат Қарасаевты бір эпизод бойынша ақтағанымен, қызметтік өкілеттіктерді теріс пайдалану және кәсіпкерлік қызметке заңсыз қатысу баптары бойынша кінәлі деп таныды. Нәтижесінде ол 3 жыл 3 айға бас бостандығынан айырылды. Жазасын ең төменгі қауіпсіздік деңгейіндегі мекемеде өтейді.
Сонымен қатар, сот мемлекет басшысына Қарасаевты «Парасат» және «Құрмет» ордендерінен айыру туралы ұсыныс енгізу жөнінде шешім қабылдады.
