9 قاراشادان باستاپ حالىقارالىق تاسىمالداۋشىلار قازاقستان مەن وزبەكستان شەكاراسىنداعى ەلەكتروندىق كەزەكتى برونداۋ كەزىندە كەپىلدىك تولەم تولەۋگە مىندەتتى بولادى. ونىڭ مولشەرى 20 اەك، ياعني 86 500 تەڭگەنى قۇرايدى، دەپ حابارلايدى «ادىرنا» ءتىلشىسءى.
جاڭا تالاپتار «قازىعۇرت»، «ب. قونىسباەۆ» جانە «اتامەكەن» وتكىزۋ بەكەتتەرىندە ەنگىزىلەدى. ەلەكتروندىق كەزەكتى برونداۋ ءۇشىن تاسىمالداۋشى ارنايى ەلەكتروندىق شوتىندا قاجەتتى قاراجاتتىڭ بولۋىن قامتاماسىز ەتۋى ءتيىس.
ەگەر كولىك قۇرالى وتكىزۋ پۋنكتىنە بەلگىلەنگەن ۋاقىتتا كەلسە، كەپىلدىك تولەم تاسىمالداۋشىعا تولىق كولەمدە اۆتوماتتى تۇردە قايتارىلادى.
ال ەگەر تاسىمالداۋشى 90 كۇنتىزبەلىك كۇن ىشىندە قاتارىنان ەكى رەت بەلگىلەنگەن ۋاقىتتا وتكىزۋ پۋنكتىنە كەلمەسە، كەپىلدىك سوماسى قايتارىلمايدى. بۇل جاعدايدا قاراجات مەملەكەت بيۋدجەتىنە ءوندىرىپ الىنادى.
دەپارتامەنت وسىنداي تالاپ ەنگىزۋ ارقىلى شەكارادا قولدان كەزەك جاساۋدىڭ الدىن الماق.
