ەلىمىزدە جەتىم جانە اتا-اناسىنىڭ قامقورلىعىنسىز قالعان بالالاردىڭ قۇقىقتارىن قورعاۋ جۇيەسىن كۇشەيتۋگە باعىتتالعان بىرقاتار ماڭىزدى شەشىم قابىلداندى. ونىڭ قاتارىندا 2026 جىلعى 4 اقپاندا كۇشىنە ەنەتىن جاڭا زاڭ بار، دەپ حابارلايدى «ادىرنا» ءتىلشىسى.
جاڭا زاڭ نورمالارىنا سايكەس، سوتتالعان ازاماتتار ەندى بالا اسىراپ الا المايدى. ەگەر بالا تاربيەلەۋ كەزىندە قامقورشى، قورعانشى نەمەسە اسىراپ العان اتا-انانىڭ سوتتىلىعى انىقتالسا, سونداي-اق ولاردىڭ پسيحيكالىق نەمەسە ناركولوگيالىق ديسپانسەردە ەسەپتە تۇرعانى بەلگىلى بولسا, مۇنداي تۇلعالار بالا تاربيەلەۋ قۇقىعىنان دەرەۋ ايىرىلادى. سونىمەن قاتار، ۇستىنەن قىلمىستىق ءىس قوزعالعان ازاماتتارعا بالا اسىراپ الۋعا، قامقورشى، قورعانشى نەمەسە پاترونات تاربيەشى بولۋعا تىيىم سالىنادى.
«بۇل شەكتەۋلەر بالالاردى قاۋىپ-قاتەردەن قورعاپ، قاۋىپسىز ورتا قالىپتاستىرۋدى كوزدەيدى»،-دەلىنگەن حابارلامادا.
بۇدان بولەك، زاڭناماعا العاش رەت قامقورشىلار، قورعانشىلار، پاترونات تاربيەشىلەر مەن اسىراپ العان اتا-انالار تاراپىنان جىل سايىن سەنىمدىلىكتى راستاۋ مىندەتى ەنگىزىلگەن. ولار دەنساۋلىعى، تۇرعىلىقتى مەكەنجايى، سوتتىلىعىنىڭ جوقتىعى تۋرالى مالىمەتتەردى تۇراقتى تۇردە ۇسىنۋى قاجەت. سونىمەن قاتار جاڭا زاڭ بويىنشا بالانى الدىمەن جاقىن تۋىستارىنا، ال ونداي مۇمكىندىك بولماعان جاعدايدا — ەرلى-زايىپتى وتباسىلارعا بەرۋ ءتارتىبى زاڭمەن ناقتى بەكىتىلدى.
«جەتىم بالالاردىڭ قۇقىقتارىن قورعاۋ – ۇنەمى جۇيەلى نازاردى تالاپ ەتەتىن ماڭىزدى سالا. بيىل قابىلدانعان شارالار قولدانىستاعى تەتىكتەردى نىعايتىپ، قامقورشىلىق ورگاندارىنىڭ جۇمىسىن بالانىڭ مۇددەسى مەن قاۋىپسىزدىگىن باسشىلىققا الا وتىرىپ ۇيىمداستىرۋعا جول اشتى»، – دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.
