الداعى ەكى جىلدا الماتى قالاسىندا 38 قوعامدىق كەڭىستىك جاڭارتىلىپ، قايتا قۇرىلادى. بۇل تۋرالى الماتى قالاسىنىڭ اكىمى دارحان ساتىبالدى ورتالىق كوممۋنيكاتسيالار قىزمەتىنىڭ الاڭىندا وتكەن بريفينگ بارىسىندا مالىمدەدى، دەپ حابارلايدى «ادىرنا» ۇلتتىق پورتالى.
قالا اكىمىنىڭ ايتۋىنشا، پوليورتالىقتى دامىتۋ تۇجىرىمداماسى اياسىندا الماتى ەكولوگيالىق تۇرعىدان تازا، جاسىل ءارى تۇرعىندارعا جايلى مەگاپوليسكە اينالۋى ءتيىس. وسى باعىتتا جۇزەگە اسىرىلىپ جاتقان جوبالار قالالىق ورتانىڭ ساپاسىن ارتتىرۋعا، قوعامدىق كەڭىستىكتەردى ءتيىمدى پايدالانۋعا جانە تۇرعىنداردىڭ ءومىر ءسۇرۋ دەڭگەيىن جاقسارتۋعا باعىتتالعان.
اتالعان باستامالاردى ىسكە اسىرۋعا لوندون، ماسكەۋ، شانحاي قالالارىنان جانە قازاقستاننان تارتىلعان تاجىريبەلى ساراپشىلار مەن ۋربانيستەر قاتىسۋدا. كورىكتەندىرۋ جۇمىستارىنىڭ بىرىڭعاي ستاندارتتارىن ەنگىزۋ جانە جوبالاردى جۇيەلى تۇردە ۇيلەستىرۋ ماقساتىندا قالالىق ۋربانيستيكا ورتالىعى قۇرىلدى.
«2026–2027 جىلدارى 38 قوعامدىق كەڭىستىكتى جاڭعىرتۋ جانە جاڭا دەمالىس ايماقتارىن قۇرۋ جوسپارلانعان. ولاردىڭ قاتارىندا تۇڭعىش پرەزيدەنت ساياباعى، اۋەجاي كولى جاعالاۋى، ەسەنتاي جانە ۇلكەن الماتى وزەندەرىنىڭ بويى، سونداي-اق باسقا دا قالا تۇرعىندارى ءجيى باراتىن ماڭىزدى ايماقتار بار. سونىمەن قاتار، “قاسبەتتەن قاسبەتكە دەيىن” قاعيداتى بويىنشا 68 كوشە جاڭارتىلاتىن بولادى. بۇل جۇمىستار اياسىندا عيماراتتاردىڭ سىرتقى كەلبەتى جاڭارىپ، زاماناۋي جارىقتاندىرۋ جۇيەلەرى ورناتىلادى، تروتۋارلار توسەلىپ، ىرگەلەس اۋماقتار اباتتاندىرىلادى»، — دەدى دارحان ساتىبالدى.
اكىمنىڭ مالىمەتىنشە، قالا تازالىعىن ساقتاۋ جانە سانيتارلىق جاعدايدى جاقسارتۋ ءۇشىن «الماتى تازالىق» كوممۋنالدىق كاسىپورنىنىڭ قىزمەتى ەداۋىر كۇشەيتىلدى. اتاپ ايتقاندا، قىزمەتكەرلەر سانى 600 ادامنان 2 000 ادامعا دەيىن ارتتى، ەڭبەكاقى مولشەرى 170 مىڭ تەڭگەدەن 370 مىڭ تەڭگەگە دەيىن ۇلعايتىلدى. بۇدان بولەك، كوممۋنالدىق قىزمەتتىڭ ماتەريالدىق-تەحنيكالىق بازاسىن جاڭارتۋ ماقساتىندا 330 بىرلىك جاڭا ارنايى تەحنيكا ساتىپ الىندى.
سونىمەن قاتار، جاسىل ايماقتاردى كۇتىپ-ۇستاۋ مەن دامىتۋ باعىتىندا «جاسىل الماتى» بىرىڭعاي وپەراتورى قۇرىلىپ، ونىڭ قاراماعىنا كەزەڭ-كەزەڭىمەن 400 گەكتاردان استام جاسىل اۋماق بەرىلۋدە. بۇعان قوسا، «تازا قازاقستان» رەسپۋبليكالىق اكتسياسى اياسىندا جىل باسىنان بەرى الماتى قالاسىندا 9,4 مىڭ گەكتاردان استام اۋماق تازارتىلىپ، 58 مىڭ تەكشە مەتردەن استام قوقىس شىعارىلدى. بۇل جۇمىستار الداعى جىلدارى دا تۇراقتى تۇردە جالعاسىن تابادى.
