2025 جىلى 15 جەلتوقساندا الماتى قالاسىندا قازاقستان رەسپۋبليكاسى تاۋەلسىزدىك كۇنىنە وراي مەدەۋ اۋدانىندا بىردەن ەكى ءبىلىم بەرۋ مەكەمەسى تەحنيكالىق تۇرعىدان اشىلدى. №195 جاڭا بالاباقشا جانە قايتا جاڭعىرتۋدان وتكەن №99 جالپى ءبىلىم بەرەتىن مەكتەپ وقۋ-تاربيە ۇدەرىسىن باستاۋعا تولىق دايىن.
№195 بالاباقشانىڭ اۋماعى تولىق اباتتاندىرىلعان: عيماراتتىڭ اينالاسىنا اسفالت توسەلىپ، قاراعاي، شەتەن، مامىرگۇل، ۇشقات، كۇمىس جيدە، كوگال ءشوبى وتىرعىزىلعان، ىرعايدان جاسالعان بۇتالى قورشاۋ بار. بالالار ءۇشىن رەزەڭكە جابىندىسى بار جايلى بەسەدكالار، شاعىن ساۋلەتتىك نىسانلارى بار ويىن الاڭدارى سالىنعان.
اۋماعى 1 950 شارشى مەتر بولاتىن ەكى قاباتتى بالاباقشا 2 جاستان 6 جاسقا دەيىنگى بالالاردى مەكتەپكە دەيىنگى تاربيەمەن قامتۋعا ارنالعان، سىيىمدىلىعى – 140 ورىن، وقىتۋ ءتىلى – قازاق ءتىلى.
ەكى قاباتتا ءارتۇرلى جاس توپتارىنا ارنالعان توپتىق بولىمدەر ورنالاسقان. ءار توپتىڭ جانىندا كيىم شەشەتىن بولمە، جاتىن بولمە، بۋفەت جانە سانيتارلىق توراپ قاراستىرىلعان. قوسىمشا ساباقتار مۋزىكالىق زالدا وتكىزىلەدى.
ەرەكشە ءبىلىم بەرۋ قاجەتتىلىگى بار بالالار ءۇشىن نەگىزگى كىرەبەرىستە پاندۋستار ورناتىلعان، ارنايى تۇتقالارمەن جابدىقتالعان سانيتارلىق توراپ بار. بالالاردىڭ ءجۇرىپ-تۇرۋ ايماقتارى تاكتيلدى جولاقتارمەن، ال قوزعالىس باعىتتارى ارنايى قۇرالدارمەن جابدىقتالعان.
بالاباقشادا پسيحولوگ، لوگوپەد كابينەتتەرى جانە ادىستەمەلىك كابينەت بار. اس بلوگى جۇكتەۋ ايماعى مەن اس كوتەرگىشى بار جەكە كىرەبەرىسپەن قامتاماسىز ەتىلگەن. سونداي-اق مەديتسينالىق بلوكتا تامبۋر، قابىلداۋ بولمەسى، دارىگەر كابينەتى، ەمشارا، فيزيوتەراپيا كابينەتى جانە سانيتارلىق توراپ ورنالاسقان.
وسى كۇنى 1963 جىلى سالىنعان №99 مەكتەپتىڭ دە تەحنيكالىق اشىلۋى ءوتتى. اتالعان ءبىلىم ورداسىندا سوڭعى كۇردەلى جوندەۋ 20 جىل بۇرىن جۇرگىزىلگەن. وتكەن جىلى اۋقىمدى قايتا جاڭعىرتۋ جانە باستاۋىش سىنىپ وقۋشىلارىنا ارنالعان، 250 بالاعا ەسەپتەلگەن 3 قاباتتى قوسىمشا عيمارات سالۋ تۋرالى شەشىم قابىلدانعان.
قازىرگى ۋاقىتتا مەكتەپ اۋماعى تولىق اباتتاندىرىلىپ، بوز ارشا مەن قايىڭ كوشەتتەرى وتىرعىزىلعان. وقۋشىلار ءۇشىن سپورت ستاديونى سالىنعان.
مەكتەپ عيماراتى 520 ورىنعا ەسەپتەلگەن. قوسىمشا ساباقتار مۋزىكالىق اسپاپتارمەن تولىق جابدىقتالعان مۋزىكا كابينەتىندە وتەدى. وندا دومبىرا، داۋىلپاز، اساتاياق، تۇياقتاس، شاڭقوبىز، پيانينو، بايان، كاستانەت، كسيلوفون، ماراكاس سىندى اسپاپتار بار.
مەكتەپتە حيميا، فيزيكا، بيولوگيا كابينەتتەرى، سپورت زالى، كوركەم ەڭبەك كابينەتى (ۇلدار مەن قىزدارعا ارنالعان) جانە 100 ورىندىق اكت زالى جۇمىس ىستەيدى.
بالالاردىڭ قاۋىپسىزدىگىنە دە ەرەكشە كوڭىل بولىنگەن: ءورت قاۋىپسىزدىگى جۇيەسى ەنگىزىلىپ، ارنايى حابارلاۋ داتچيكتەرى ورناتىلعان، عيماراتتا سەيسميكالىق كۇشەيتۋ جۇمىستارى جۇرگىزىلگەن. جەرتولە بولىگىندە سۋ ولشەۋ جانە جىلۋ توراپتارى، جەلدەتۋ كامەراسى مەن ەلەكتر قالقانى ورنالاسقان.
