بۇگىن – جەلتوقسان قۇرباندارىن ەسكە الۋ، دەموكراتيالىق جاڭارۋ كۇنى، دەپ حابارلايدى «ادىرنا» ءتىلشىسى.
1986 جىلعى 16 جەلتوقساندا كەڭەس وداعىنىڭ كوممۋنيستىك بيلىگى جەرگىلىكتى حالىقتىڭ پىكىرىن ەسكەرمەي، قازاقستانعا سىرتتان باسشى تاعايىنداۋ تۋرالى شەشىم قابىلداعان ەدى. بۇل ادىلەتسىزدىككە قارسى مىڭداعان قازاق جاستارى ەكى كۇن قاتارىنان الماتى قالاسىنىڭ ورتالىق الاڭىنا جينالىپ، بەيبىت نارازىلىق بىلدىرگەن. الايدا كەڭەستىك بيلىك شەرۋدى كۇشپەن تاراتۋ ءۇشىن ميليتسيا مەن اسكەردى جۇمىلدىرىپ، بەيبىت جاستارعا قارسى اسكەري كۇرەك پەن وزگە دە كۇش قولدانۋ قۇرالدارىن پايدالانعان.
تاۋەلسىز قازاقستان تاريحىندا «جەلتوقسان وقيعاسى» دەگەن اتاۋمەن قالعان بۇل كوتەرىلىسكە قاتىسقاندار قاتاڭ قۋعىن-سۇرگىنگە ۇشىرادى. كەڭەس بيلىگى 99 ادامدى ءارتۇرلى مەرزىمگە سوتتاپ، ەكى ادامعا اتۋ جازاسىن كەستى. قازاقستان تاۋەلسىزدىك العاننان كەيىن جەلتوقسان وقيعاسىنا قاتىسقان ازاماتتاردىڭ بارلىعى تولىق اقتالدى. بۇل وقيعا كەڭەس وداعى تاريحىنداعى ۇلت-ازاتتىق سيپاتتاعى العاشقى جاپپاي قوزعالىستاردىڭ ءبىرى رەتىندە تاريحتا قالدى.
1991 جىلعى 12 جەلتوقساندا تۇڭعىش پرەزيدەنت نۇرسۇلتان نازارباەۆ «1986 جىلعى 17–18 جەلتوقسان وقيعالارىنا قاتىسقانى ءۇشىن جاۋاپكەرشىلىككە تارتىلعان ازاماتتاردى اقتاۋ تۋرالى» جارلىققا قول قويعان ەدى. اتالعان قۇجات ارقىلى جەلتوقسان وقيعاسىنا قاتىسقان ازاماتتارعا قۇقىقتىق ءارى ساياسي تۇرعىدان ءادىل باعا بەرىلىپ، نەگىزسىز قۋعىن-سۇرگىنگە ۇشىراعاندار تولىق اقتالدى. سونىمەن قاتار 17 جەلتوقسان «دەموكراتيالىق جاڭارۋ كۇنى» رەتىندە بەلگىلەندى.
الايدا بۇگىندە «دەموكراتيالىق جاڭارۋ كۇنىنە» قاتىستى رەسمي اقپارات سيرەك كەزدەسەدى. سوڭعى جىلدارى بۇل كۇن رەسمي كۇنتىزبەدەن الىنىپ تاستالدى. قوعام بۇل كۇندى كوبىنە جەلتوقسان وقيعاسىمەن عانا بايلانىستى ەسكە الادى.
