ءۇندىستاننىڭ 12 شتاتىندا 118 ميلليون ايەل ەندى ءۇي شارۋاسىن جۇرگىزگەنى ءۇشىن تۇراقتى تولەم الادى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
قاراجات ءۇي شارۋاسىن جۇرگىزۋ جانە كۇتىم جاساۋ مىندەتتەرىن ورىنداعانى ءۇشىن تولەنەدى. تولەم مولشەرى ايىنا شامامەن 12–30 اقش دوللارىن قۇرايدى. بۇل ورتاشا ءبىر ءۇي شارۋاشىلىعى تابىسىنىڭ نەبارى 5–12 پايىزى بولسا دا، قاراجات تۇراقتى تۇردە بەرىلىپ، ايەلدەرگە ونى وتباسىنىڭ قاجەتتىلىكتەرىنە — بالالاردىڭ بىلىمىنە، ازىق-تۇلىككە، تاماق دايىنداۋعا ارنالعان گازعا، مەديتسينالىق شىعىندارعا، ۇساق قارىزداردى وتەۋگە، كەيدە جەكە قاجەتتىلىكتەرىنە نەمەسە التىن اشەكەيلەر ساتىپ الۋعا جۇمساۋعا مۇمكىندىك بەرەدى.
باعدارلاماعا قاتىسۋ تالاپتارى ءار شتاتتا ءارتۇرلى. ىرىكتەۋ كەزىندە جاس مولشەرى مەن تابىس دەڭگەيى ەسكەرىلەدى، سونداي-اق مەملەكەتتىك قىزمەتكەرلەرى بار، سالىق تولەيتىن، اۆتوكولىگى نەمەسە ءىرى جەر تەلىمى بار وتباسىلار بۇل باعدارلامادان تىس قالادى.
لوندون كورولدىك كوللەدجىنىڭ قۇقىق جانە الەۋمەتتىك ادىلەت پروفەسسورى پرابحا كوتيسۆاران بۇل باعدارلامانى ء«ۇندىستان شتاتتارى دەڭگەيىندە ايەلدەرگە ارنالعان الەۋمەتتىك قامسىزداندىرۋ جۇيەسىنىڭ ەلەۋلى ۇلعايۋى» دەپ باعالادى. ونىڭ ايتۋىنشا، تولەمدەر ايەلدەرگە ءۇي شارۋاشىلىعىنىڭ دا، وزدەرىنىڭ دە ەڭ وزەكتى قاجەتتىلىكتەرىن وتەۋگە مۇمكىندىك بەرىپ، قارجىلىق تاۋەلسىزدىك سەزىمىن قايتارادى.
ساياسي ورتادا بۇل باستامانى سىنعا العاندار دا بار. كەيبىرەۋلەر ونى الداعى سايلاۋلار قارساڭىندا داۋىس ساتىپ الۋدىڭ ءبىر ءتاسىلى رەتىندە باعالايدى. سونىمەن قاتار تولەمدەرگە كەتەتىن شىعىندار شتات بيۋدجەتتەرىنە ەلەۋلى سالماق تۇسىرمەك. بيىل بۇل باعدارلاماعا شامامەن 18 ملرد دوللار جۇمساۋ جوسپارلانعان.
بۇعان دەيىن ءۇندىستان استىق، جانارماي جانە اۋىل شارۋاشىلىعى ونىمدەرىنە سۋبسيديا بەرىپ كەلگەن ەدى.
