قازاقستاندا ەلەكتروموبيل ساتىپ الۋداعى نەگىزگى ارتىقشىلىقتاردىڭ ءبىرى – ولاردى كۆوتا اياسىندا باجسىز اكەلۋ مۇمكىندىگى بولاتىن. الايدا 2026 جىلدان باستاپ بۇل جەڭىلدىك ەل ءۇشىن قولدانىلمايدى، دەپ حابارلايدى "ادىرنا" ۇلتتىق پورتالى Tengri Auto-عا سىلتەپ.
ەۋرازيالىق ۇكىمەتارالىق كەڭەستىڭ وتىرىسىندا ۇكىمەت باسشىلارى كەلەسى جىلدان باستاپ ەلەكتروموبيلدەردى باجسىز اكەلۋ قۇقىعى تەك ارمەنياعا (15 مىڭ), بەلارۋسكە (20 مىڭ) جانە قىرعىزستانعا (15 مىڭ) ساقتالاتىنى جونىندە كەلىسىمگە كەلدى. قازاقستان بۇل تىزىمگە ەنبەدى.
سونىمەن قاتار، باجسىز اكەلىنگەن ەلەكتروموبيلدەردى قازاقستان مەن رەسەي ازاماتتارىنا نەمەسە رەزيدەنتتەرىنە بەرۋ دە تىيىم سالىنعان.
مەملەكەتتىك كىرىستەر كوميتەتىنىڭ مالىمەتىنشە، 2025 جىلعى 15 قازانعا قاراي كۆوتا تولىق يگەرىلگەن. ياعني، قازاقستانعا رۇقسات ەتىلگەن 15 مىڭ ەلەكتروموبيل تولىعىمەن اكەلىنىپ قويعان.
بيىلعى جىلى ەلەكتروموبيلدەرگە ارنالعان كۆوتا تولىعىمەن اياقتالدى، ال 2026 جىلى ول مۇلدە قاراستىرىلمايدى. وسىعان بايلانىستى شەتەلدەن ەلەكتروموبيل ساتىپ الۋدى جوسپارلاعان ازاماتتار ونى ەندى جالپى تارتىپپەن راسىمدەۋگە ءماجبۇر بولادى.
