Qyrǧyzstannyŋ konstitusiialyq soty ölım jazasyn qaitaru mäselesın qaraudan bas tartty, dep habarlaidy «Adyrna» tılşısı 24.kg-ge sılteme jasap.
«Konstitusiia adam qūqyqtary men bostandyqtaryn eŋ joǧarǧy qūndylyq retınde bekıtedı. Olardy qamtamasyz etuge arnalǧan kepıldıkter jüiesı konstitusiialyq qūrylymnyŋ negızın qūrap, negızgı zaŋǧa engızıletın özgerısterdıŋ şegın aiqyndaidy. Osyǧan bailanysty Konstitusiialyq sot negızgı zaŋǧa qatysty kez kelgen özgerıs olardyŋ jüielılıgı men bükıl konstitusiialyq modeldıŋ jūmys ısteuıne äserın eskere otyryp qarastyryluy qajet ekenın atap öttı.
Qūqyqtar men bostandyqtarǧa qatysty kerı ketudı (non-regress) boldyrmauǧa erekşe köŋıl bölınuı tiıs, öitkenı olardyŋ tūraqtylyǧy men sabaqtastyǧy adam men onyŋ qadır-qasietınıŋ konstitusiialyq tūrǧyda bekıtılgen basymdyǧynyŋ mazmūnyn qūraidy»,- delıngen habarlamada.
Osy tūrǧyda konstitusiialyq baqylau organy ölım jazasyna tyiym salu jäne ömır süru qūqyǧynyŋ basymdyǧyn moiyndau tek qūqyqtyq normalar ǧana emes, sonymen bırge asa maŋyzdy qūndylyqtyq ölşem ekenın atap öttı.
Būǧan qosa, Qyrǧyzstannyŋ halyqaralyq mındettemelerı bar ekenı körsetılgen. Vena konvensiiasyna säikes, memleket halyqaralyq şarttardy oryndamau üşın ışkı zaŋnamasyna jügıne almaidy, al şartty toqtatu nemese uaqytşa toqtata tūru tek qataŋ belgılengen jaǧdailarda ǧana mümkın.
Konstitusiialyq jäne halyqaralyq-qūqyqtyq dälelderdıŋ jiyntyǧyn eskere otyryp, Konstitusiialyq sot ölım jazasyn konstitusiialyq tüzetu arqyly qaitaru negızgı zaŋǧa qaişy, jol berılmeitın jäne qūqyqtyq tūrǧyda mümkın emes degen şeşım şyǧardy.
Aita keteiık, 1 qazanda el prezidentı Sadyr Japarov Qyrǧyzstan 2007 jyly bas tartqan ölım jazasyn qaitaruǧa qatysty zaŋnamalyq özgerısterdı daiyndaudy tapsyrǧan bolatyn. Būl şeşım 17 jastaǧy qyzdyŋ rezonansty ölımıne bailanysty qabyldanǧan. Parlament maqūldaǧan jaǧdaida ölım jazasyn qaitaru turaly zaŋ jobasyn referendumǧa şyǧaru josparlanǧan edı.
