The New York Times (NYT) 4 желтоқсан күні АҚШ-тың соғыс министрлігіне (Пентагонға) қарсы Вашингтонның Округтік сотына талап-арыз берді. Газет ведомство енгізген журналистерге арналған жаңа ережелер Бірінші түзетуді, яғни баспасөз еркіндігін кепіл ететін конституциялық норманы бұзады деп есептейді. Бұл туралы басылым талап-арыз түсірілуіне бірнеше сағат қалғанда жариялады, деп хабарлайды "Адырна".
NYT-тің жазуынша, қазан айынан бастап күшіне енген ішкі регламент журналистерден 21 беттік құжатқа қол қоюды талап етеді. Онда:
-
ақпарат көздерімен байланысқа шектеу;
-
ақпарат сұрауға байланысты жаңа талаптар сияқты шектеулер бар.
Газет бұл нормалар Пентагонның бұрын баспасөз үшін ашық болған салаларды жабу әрекеті деп санайды. Басылымның пікірінше, ведомство журналистерге «министрлік пен басшылықтың іс-әрекеттерін батыл әрі тәуелсіз зерттеп, жариялауға» кедергі жасауға тырысады.
Газет соттан Пентагонның жаңа ережелерін баспасөзге қолдануға тыйым салуды, сондай-ақ Бірінші түзетуді бұзатын нормаларды заңсыз деп тануды сұрайды.
Басылымның пікірінше, бұл талап журналистиканың «заңды әрі қалыпты ақпарат жинау әдістерін» мүмкін емес етеді.
Пентагон қазан айында жаңа ережелерді «нысанға қол жеткізу – бұл реттелуі тиіс артықшылық»деп түсіндірді.
Ведомство нормалар ұлттық қауіпсіздікке нұқсан келтіретін ақпараттың таралуын болдырмау үшін енгізілгенін мәлімдеді.
NYT-тің мәліметінше, ондаған журналист жаңа ережелерден бас тартып, өзіне берілген рұқсат қағаздарын қайтарып берген.
Бірқатар ірі медиа ұйымдар Пентагонды ашық сынға алды.
«Бұл саясаттың баламасы жоқ және журналистердің негізгі қорғаныс механизмдеріне қауіп төндіреді», делінген ABC News, CBS News, CNN, Fox News және NBC News мәлімдемесінде.
NYT атап өткендей, журналистерге қатысты шектеулер ақпан айынан бері күшейіп келеді.
Қаңтардың соңында қызметіне кіріскен министр Пит Хегсетт NYT және басқа бірнеше медиа ұйымды Пентагондағы арнайы бюроларынан айырған. Олардың орнына консервативті медиа – Newsmax, Breitbart News және басқалары орналастырылған.
Мамыр айында Хегсетт журналистердің Пентагон ғимараттарының көп бөлігінде арнайы сүйемелдеусіз жүре алмайтынын белгілеген бұйрық шығарды.
