تۋريزم جانە سپورت ۆيتسە-ءمينيسترى سەرىك جاراسباەۆ الەم چەمپيونى جانىبەك ءالىمحانۇلىنا قاتىستى تۋىنداعان دوپينگ داۋىنا پىكىر ءبىلدىردى، دەپ حابارلايدى «ادىرنا» ءتىلشىسى.
7 جەلتوقسان كۇنى وتانداسىمىز كۋبالىق ەريسلاندي لاراعا قارسى جەكپە-جەك وتكىزۋى كەرەك ەدى. الايدا 3 جەلتوقسانعا قاراعان ءتۇنى ءالىمحانۇلىنىڭ دوپينگ سىناماسىنان تىيىم سالىنعان مەلدوني دارىلىك زاتى تابىلعانى ايتىلدى. وسىدان كەيىن ۇيىمداستىرۋشىلار ونى جەكپە-جەكتەن شەتتەتتى.
«جانىبەك ءالىمحانۇلى جانە ونىڭ كومانداسىمەن بايلانىستامىز. ءبىز ونىڭ دوپينگ قولدانباعانىن دالەلدەۋگە دەگەن تالپىنىسىن تولىق قولدايمىز، وتانداسىمىزعا سەنەمىز. قۇزىرلى انتيدوپينگ ۇيىمدارى بۇل جاعدايدى تولىق ءارى ءادىل تەكسەرەدى دەپ ويلايمىن. قازىر قانداي دا ءبىر قورىتىندى جاساۋعا ەرتە. بىراق ءبىر فاكت بار، جەكپە-جەك توقتاتىلدى. ءبىز جاعدايدىڭ وڭ ناتيجەمەن اياقتالۋىن كۇتەمىز»،-دەدى جاراسباەۆ ۇكىمەت كۋلۋارىندا.
ەسكە سالايىق، بۇعان دەيىن The Ring جانىبەك ءالىمحانۇلىنىڭ دوپينگ قولداندى دەگەن كۇدىككە ىلىنگەنىن مالىمدەگەن ەدى. بۇل ايىپتاۋدان كەيىن وتانداسىمىز جەلىدە جازبا قالدىرىپ، بۇل جاڭالىقتى وقىعاندا تاڭعالعانىن جەتكىزدى.
«VADA ءبىرىنشى سىناقتى وتكىزىپ، ءبارى تازا ەكەنىن ايتتى. ۆيتاميندەردى قابىلداۋ رەجيمىنە ەشقانداي وزگەرىس ەنگىزگەن جوقپىن. ەكىنشى تەستە نە بولعانىن بىلمەيمىن، سوندىقتان ونى قايتا تەكسەرۋدى تالاپ ەتتىم»، — دەدى سپورتشى.
