بريۋسسەلدە ەۋروپالىق وداق قاراجاتىن ماقساتسىز پايدالاندى دەگەن كۇدىككە بايلانىستى تەرگەۋ جۇرگىزىلدى، دەپ حابارلايدى "ادىرنا" ۇلتتىق پورتالى.
تەرگەۋ اياسىندا بريۋسسەل قالاسىنداعى ەۋروپالىق سىرتقى ءىس-قيمىل قىزمەتىنىڭ شتاب-پاتەرىندە جانە بريۋگگە قالاسىنداعى ەۋروپا كوللەدجىندە ءتىنتۋ جۇرگىزىلدى. سونىمەن قاتار كۇدىكتىلەردىڭ ۇيلەرى دە تەكسەرىلىپ، ءۇش ادام ۇستالدى. بۇل تۋرالى ەۋروپالىق پروكۋراتۋرا 2 جەلتوقساندا حابارلادى.
پروكۋراتۋرا مالىمەتىنشە، تەرگەۋ ەو قارجىلاندىرعان جاس ديپلوماتتاردى دايارلاۋ باعدارلاماسىنا بولىنگەن قاراجاتتىڭ جۇمسالۋىنا قاتىستى. تەرگەۋ سۋدياسىنىڭ رۇقساتىمەن بەلگيانىڭ فەدەرالدىق پوليتسياسى بىرقاتار نىسانداردا ءتىنتۋ جۇمىستارىن جۇرگىزىپ، قۇجاتتاردى تاركىلەدى. وپەراتسيا ەۋروپالىق الاياقتىقپەن كۇرەس باسقارماسىنىڭ قولداۋىمەن وتكەن.
باسقارما ءىستىڭ الاياقتىق، سىبايلاس جەمقورلىق، مۇددەلەر قاقتىعىسى جانە قىزمەتتىك قۇپيانى زاڭسىز اشۋ دەرەكتەرىمەن بايلانىستى بولۋى مۇمكىن ەكەنىن اتاپ ءوتتى.
AFP اگەنتتىگىنىڭ دەرەگىنشە، ۇستالعانداردىڭ ءبىرى – بۇرىنعى ەۋروپالىق ديپلوماتيا باسشىسى، قازىرگى ۋاقىتتا ەۋروپا كوللەدجىنىڭ رەكتورى قىزمەتىن اتقارىپ جۇرگەن فەدەريكا موگەريني بولۋى مۇمكىن. سونىمەن بىرگە يتاليا ديپلوماتى، ەۋروپالىق سىرتقى ءىس-قيمىل قىزمەتىنىڭ بۇرىنعى باس ديرەكتورى، قازىر ەۋروكوميسسيادا تاياۋ شىعىس، سولتۇستىك افريكا جانە پارسى شىعاناعى ەلدەرى بويىنشا دەپارتامەنتتى باسقاراتىن ستەفانو ءساننينيدىڭ دە ۇستالعانى حابارلاندى.
