ارمەنيانىڭ ەۋروپالىق وداققا (ەو) مۇشەلىككە ءوتىنىش بەرۋ مۇمكىندىگى ازىرگە ەۋروپالىق وداقتىڭ كەڭەيۋ ماسەلەسىنە قاتىستى نەگىزگى تالقىلاۋلاردىڭ قاتارىندا جوق. بۇل تۋرالى ەۋروپالىق كەڭەس پرەزيدەنتى انتونيۋ كوشتانىڭ ەو ەلدەرىنىڭ استانالارىنا جوسپارلانعان ساپارى جونىندەگى بريفينگ بارىسىندا ۇيىم وكىلى مالىمدەدى, دەپ حابارلايدى "ادىرنا".
كوشتا 25 تامىزدان باستاپ ەو-عا مۇشە 27 مەملەكەتتىڭ استانالارىنا ساپار جاساپ، قازان ايىندا وتەتىن ەۋروپالىق كەڭەستىڭ ستراتەگيالىق پىكىرتالاستارىنا دايىندىق جۇرگىزەدى. نەگىزگى تاقىرىپتاردىڭ ءبىرى – ەۋروپالىق وداقتىڭ ودان ءارى كەڭەيۋى.
ەۋروپالىق كەڭەس وكىلىنىڭ ايتۋىنشا، ارمەنيا قازىرگى ۋاقىتتا ەو-عا كانديدات ەل مارتەبەسىنە يە ەمەس. سوندىقتان ونىڭ ىقتيمال مۇشەلىك ءوتىنىشى كوشتانىڭ وسى ساپارلارى اياسىنداعى جوسپارعا ەنگىزىلمەگەن.
«قازىرگى ۋاقىتتا ارمەنيا كانديدات ەل سانالمايدى، سوندىقتان ازىرگە بۇل ءبىزدىڭ جوسپارىمىزعا كىرمەيدى»، – دەدى ەۋروپالىق كەڭەس وكىلى جۋرناليستەرگە.
ارمەنيانىڭ ەو-عا ۇمتىلىسى
ارمەنيانىڭ ەۋروپالىق وداقپەن جاقىنداسۋعا دەگەن ۇمتىلىسى سوڭعى ۋاقىتتا ايتارلىقتاي كۇشەيدى. بيىل ناۋرىز ايىندا ەل پارلامەنتى ەو-عا مۇشەلىككە ءوتۋ پروتسەسىن باستاۋ تۋرالى زاڭدى ماقۇلداعان بولاتىن.
الايدا بۇل شەشىم ارمەنياعا اۆتوماتتى تۇردە كانديدات مارتەبەسىن بەرمەيدى. ەل الدىمەن ەۋروپالىق وداققا رەسمي تۇردە مۇشەلىككە ءوتىنىش تاپسىرۋى كەرەك. وسىدان كەيىن بريۋسسەل ءوتىنىشتى بەلگىلەنگەن ءراسىم بويىنشا قاراپ، ەلدىڭ كوپەنگاگەن كريتەريلەرىنە جانە ەو-عا مۇشەلىك تالاپتارىنا سايكەستىگىن باعالايدى.
قازىرگى تاڭدا ەرەۆاننىڭ ءوتىنىشتى ناقتى قاي ۋاقىتتا بەرەتىنى بەلگىسىز. ەۋروپالىق كەڭەس وكىلى دە ارمەنيانىڭ مۇشەلىككە ءوتىنىش بەرۋ مەرزىمىنە قاتىستى ناقتى اقپارات جوق ەكەنىن اتاپ ءوتتى.
انتونيۋ كوشتانىڭ ەو استانالارىنا ساپارى قازان ايىندا وتەتىن ەۋروپالىق كەڭەستىڭ كەڭەيۋ ماسەلەسىنە ارنالعان ستراتەگيالىق پىكىرتالاستارىنا دايىندىقپەن بايلانىستى. كوشتا ەو ەلدەرىنىڭ باسشىلارىمەن وداقتىڭ بولاشاقتاعى كەڭەيۋىنە قاتىستى ۇستانىمداردى تالقىلاماق.
ارمەنيا ازىرگە بۇل پروتسەستىڭ رەسمي كانديداتتارى قاتارىندا بولماسا دا، ونىڭ ەو-مەن قارىم-قاتىناستى تەرەڭدەتۋگە باعىتتالعان قادامدارى ەۋروپاداعى ينتەگراتسيالىق ۇدەرىستەر اياسىندا نازار اۋدارتىپ وتىر.
ەگەر ارمەنيا بولاشاقتا رەسمي ءوتىنىش بەرسە، ونىڭ كانديدات مارتەبەسىن الۋى جانە كەيىنگى مۇشەلىك پروتسەسى ەو-نىڭ قولدانىستاعى ەرەجەلەرى مەن بارلىق مۇشە مەملەكەتتەردىڭ كەلىسىمىنە بايلانىستى بولادى.
