ەكونوميكالىق جانە سىبايلاس جەمقورلىققا قارسى كۇرەس اگەنتتىگىنىڭ بۇرىنعى توراعاسى ءارى باس پروكۋرور قىزمەتىن اتقارعان قايرات قوجامجاروۆقا قاتىستى سوتقا دەيىنگى تەرگەۋ باستالدى، دەپ حابارلايدى "ادىرنا" ۇلتتىق پورتالى.
باس پروكۋراتۋرانىڭ مالىمەتىنشە، ءىس ونىڭ ءارتۇرلى باسشىلىق قىزمەت اتقارعان كەزەڭدەرىندە قىزمەتتىك وكىلەتتىگىن اسىرا پايدالانۋ جانە قىلمىستىق جولمەن الىنعان قارجىنى زاڭداستىرۋ فاكتىلەرى بويىنشا قوزعالعان.
«بارلىق قىلمىستىق ىستەر بويىنشا ارنايى پروكۋرورلاردىڭ باسشىلىعىمەن جەدەل-تەرگەۋ توپتارى قۇرىلدى»، – دەپ ءمالىم ەتتى قاداعالاۋ ورگانى.
حابارلامادا قوجامجاروۆتىڭ ۇستالعان-ۇستالماعانى كورسەتىلمەگەن.
قر قپك-ءنىڭ 201-بابىنا سايكەس وزگە اقپارات جاريالانبادى.
ايتا كەتەيىك، قايرات قوجامجاروۆ ءار جىلدارى قارجى پوليتسياسىن باسقاردى، اقمولا وبلىسىنىڭ اكىمى بولدى، پرەزيدەنتتىڭ كومەكشىسى قىزمەتىن اتقاردى، انتيكوررۋپتسيالىق ۆەدومستۆونى جانە قر باس پروكۋراتۋراسىن باسقاردى. ول 2023 جىلدان بەرى مەملەكەتتىك قىزمەتتە ەمەس.
