قازاقستاندا 326 لوتو كلۋب قىزمەتىنە توسقاۋىل قويىلدى. ىشكى ىستەر مينيسترلىگى ۇلتتىق قاۋىپسىزدىك كوميتەتىمەن بىرلەسىپ، باس پروكۋراتۋرانىڭ ۇيلەستىرۋىمەن لوتەرەيا كلۋبتارىنىڭ اتىمەن جۇمىس ىستەيتىن زاڭسىز ونلاين-كازينولاردىڭ ءىرى جەلىسىن جويدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ەڭ اۋقىمدى ارنايى وپەراتسياعا ىشكى ىستەر مينيسترلىگى مەن ۇلتتىق قاۋىپسىزدىك كوميتەتىنىڭ 3 مىڭنان استام قىزمەتكەرى جۇمىلدىرىلدى.
وپەراتسيا بارىسىندا پوليتسياعا 400-دەن استام ادام جەتكىزىلدى.
سونداي-اق، رەسپۋبليكا بويىنشا لوتو كلۋبتارعا 570 ءتىنتۋ جۇرگىزىلدى. 23 بىرلىك اتىس جانە تراۆماتيكالىق قارۋ، 247 ملن تەڭگە، 55 ملن رەسەي ءرۋبلى، 125 مىڭ اقش دوللارى، كومپيۋتەرلىك تەحنيكا، ءموبيلدى قۇرىلعىلار تاركىلەندى.
