يزرايل پرەمەر-ءمينيسترى بينيامين نەتانياحۋ وزىنە قاتىستى جۇرگىزىلىپ جاتقان بىرنەشە قىلمىستىق ءىس اياسىندا پرەزيدەنت يتسحاك گەرتسوگقا كەشىرىم بەرۋ جونىندە ءوتىنىش جولدادى. بۇل تۋرالى يزرايل پرەزيدەنتىنىڭ كەڭسەسى جازدى، دەپ حابارلايدى “ادىرنا”.
Report اگەنتتىگى Ynet باسىلىمىنا سىلتەمە جاساپ حابارلاعانداي، ءوتىنىش پرەمەر-ءمينيستردىڭ ادۆوكاتى اميت حاداد ارقىلى پرەزيدەنت اكىمشىلىگىنىڭ قۇقىقتىق بولىمىنە تاپسىرىلعان. پرەزيدەنت كەڭسەسى بۇل ءوتىنىشتى «سالدارى ايتارلىقتاي ماڭىزدى، ەرەكشە سيپاتتاعى» قۇجات دەپ اتاپ ءوتتى.
«بارلىق ساراپتامالىق قورىتىندىلار تۇسكەننەن كەيىن پرەزيدەنت بۇل ءوتىنىشتى ەڭ جوعارى جاۋاپكەرشىلىكپەن جانە مۇقيات قاراستىرادى»، — دەلىنگەن رەسمي مالىمدەمەدە.
بۇعان دەيىن ءيزرايلدىڭ باس پروكۋرورى بينيامين نەتانياحۋعا الاياقتىق، پارا الۋ جانە سەنىمدى تەرىس پايدالانۋ باپتارى بويىنشا ايىپ تاققان بولاتىن. تەرگەۋ بىرنەشە جىل بويى جالعاسىپ كەلەدى جانە يزرايل ساياسي ومىرىندەگى اسا رەزونانستى ىستەردىڭ ءبىرى سانالادى.
پرەمەر-ءمينيستردىڭ كەشىرىم سۇراۋى ءيزرايلدىڭ ىشكى ساياسي كەڭىستىگىندە جاڭا تالقىلاۋلارعا تۇرتكى بولدى. ساراپشىلاردىڭ پىكىرىنشە، مۇنداي قادام نەتانياحۋدىڭ وزىنە تاعىلعان ايىپتار بويىنشا سوت پروتسەستەرىنىڭ كۇشەيۋىنە بايلانىستى جاسالعان بولۋى مۇمكىن. پرەزيدەنت گەرتسوگتىڭ شەشىمى ەلدەگى ساياسي احۋالعا ەلەۋلى اسەر ەتۋى ىقتيمال.
