فوتو: Reuters
تۇركيانىڭ سىرتقى ىستەر مينيسترلىگى سوڭعى كۇندەرى قارا تەڭىزدە مۇناي تانكەرلەرىنە جاسالعان شابۋىلدارعا بايلانىستى رەسمي الاڭداۋشىلىق ءبىلدىردى. مينيسترلىك وكىلى ءوندجۋ كەچەلي 30 قاراشادا تاراتقان مالىمدەمەسىندە گامبيا تۋى استىندا جۇرگەن Kairos جانە Virat تانكەرلەرىنە جاسالعان سوققىلار وڭىردەگى كەمە قاتىناسى قاۋىپسىزدىگىنە ەلەۋلى قاتەر توندىرگەنىن اتاپ ءوتتى.
كەچەلىنىڭ ايتۋىنشا، اتالعان شابۋىلدار تۇركيانىڭ ايرىقشا ەكونوميكالىق ايماعىندا تىركەلگەن.
«بۇل وقيعالار كەمە قاتىناسى ءۇشىن عانا ەمەس، ادامداردىڭ ءومىرى، مۇلىك جانە قورشاعان ورتا ءۇشىن دە ايتارلىقتاي قاۋىپ تۋعىزدى»، – دەدى ول.
شابۋىلدارعا جاۋاپكەرشىلىكتى ۋكراينا ءوز موينىنا العانىمەن، تۇركيانىڭ رەسمي مالىمدەمەسىندە كيەۆتىڭ ارەكەتى تىكەلەي ايىپتالماعان. مينيسترلىك وكىلى انكارانىڭ «قىزىعۋشىلىق تانىتقان تاراپتارمەن بايلانىستا» ەكەنىن، قارا تەڭىز ايماعىندا سوعىستىڭ ۋشىعۋىنا جول بەرمەۋگە جانە تۇركيانىڭ ەكونوميكالىق مۇددەلەرىن قورعاۋعا تىرىساتىنىن مالىمدەدى.
28 قاراشا كەشكىسىندە تۇركيا جاعالاۋىندا بولعان وقيعادا Kairos جانە Virat تانكەرلەرى سوققىعا ۇشىراعان. ۋكراينالىق باق دەرەكتەرىنە سايكەس، ولاردى ۋكراينا قاۋىپسىزدىك قىزمەتىنىڭ (سبۋ) Sea Baby تەڭىز دروندارى زاقىمداعان. ەكى تانكەر دە جۇكسىز كۇيدە رەسەيدىڭ نوۆوروسسيسك پورتىنا باعىت العان.
بۇل تانكەرلەر رەسەيدىڭ سانكتسيادان جالتارۋ ءۇشىن قولداناتىن «كولەڭكەلى فلوتىنا» جاتاتىندىعىمەن بەلگىلى. ولار باتىس ەلدەرىنىڭ سانكتسياسىنا ىلىككەن جانە رەسەي مۇنايىن تاسىمالداۋعا قاتىسقانى ءۇشىن حالىقارالىق باقىلاۋدا.
وقيعالار رەسەي – ۋكراينا اراسىنداعى سوعىس تەڭىزگە قاراي اۋىسا باستاعانىن كورسەتەدى. قارا تەڭىز ارقىلى حالىقارالىق جۇك تاسىمالىنا تاۋەلدى تۇركيا جاعدايدىڭ ۋشىعۋى ايماقتىق قاۋىپسىزدىك پەن ەكونوميكالىق تۇراقتىلىققا قاۋىپ توندىرەتىنىن اتاپ وتۋدە.
بۇدان الدىن قازاقستان ۋكرايناعا نوۆوروسسيسك تەڭىز پورتى اكۆاتورياسىندا حالىقارالىق كاسپي قۇبىر كونسورتسيۋمىنىڭ اسا ماڭىزدى ينفراقۇرىلىمىنا باعىتتالعان كەزەكتى ماقساتتى شابۋىلعا بايلانىستى رەسمي تۇردە نارازىلىق بىلدىرگەن. استانا كيەۆتىڭ شابۋىلىن ەكى جاقتى "قاتىناسقا زالال كەلتىرەتىن ارەكەت" دەپ باعالاعان.
