قاڭتار وقيعاسىنا بايلانىستى كۇدىكتى رەتىندە ۇستالىپ، "جاپپاي تارتىپسىزدىكتى ۇيىمداستىرۋ جانە قاتىسۋ" بابى بويىنشا ايىپتالعان الماتى ءماسليحاتىنىڭ دەپۋتاتى قايرات قۇدايبەرگەننىڭ اتاسى، الماتى قالاسى الاتاۋ اۋداندىق ارداگەرلەر ۇيىمىنىڭ توراعاسى قابدوللين قۇدايبەرگەن پرەزيدەنت قاسىم-جومارت توقاەۆقا ۇندەۋ جولداپ، نەمەرەسىنە قاتىستى ىستە ادىلدىك ورناۋىنا كومەكتەسۋدى ءوتىندى. بۇل تۋرالى @ne_habar_news ينستاگرام پاراقشاسى جاريالادى، دەپ حابارلايدى "ادىرنا" ۇلتتىق پورتالى
«الماتى قالاسىنىڭ باسشىلارى، باسقا دەپۋتاتتار الاڭدا كورىنبەدى. ال ەندى، سول قايراتتى قاڭتار وقيعاسىنىڭ ۇيىمداستىرۋشىسى رەتىندە قاماۋدا ۇستاپ وتىر. بۇل قۇقىق قورعاۋ ورگاندارىنىڭ جىبەرىپ وتىرعان ۇلكەن كەمشىلىگى. ءسىزدىڭ جاڭا قازاقستان قۇرامىز دەپ وتىرعان ماقساتىڭىزعا قايشى. سوت جۇيەسى تەك ونلاين تۇردە ءوتىپ جاتىر، 1937 جىلعى قۋعىن-سۇرگىن زاماندى ەسكە تۇسىرەدى. سوندىقتان سىزدەن ءوتىنىم سۇرايتىنىم – ءادىل شەشىم شىعارۋعا كومەكتەسىڭىز» دەلىنگەن ءوتىنىش ماتىنىندە.
جەلىدە جاريالانعان ۇندەۋ استىندا پىكىر بىلدىرۋشىلەردىڭ دەنى قايرات قۇدايبەرگەنوۆتىڭ جازىقسىز قامالعانىن العا تارتىپ، ونى بوساتۋدى تالاپ ەتۋدە.
ەسكە سالا كەتەيىك، جۋىردا الماتى قالالىق سوتى قايرات قۇدايبەرگەندى قاماۋدا ۇستاۋ مەرزىمى ەكى ايعا ۇزارتىلدى.
"ادىرنا" ۇلتتىق پورتالى
