ۋكراينا پرەزيدەنتى ءوفيسىنىڭ باسشىسى اندرەي ەرماك ۆلاديمير زەلەنسكيدىڭ بەيبىتشىلىك ءۇشىن تەرريتوريا بەرۋگە ەشقاشان كەلىسپەيتىنىن ايتتى. بۇل تۋرالى ول 27 قاراشادا The Atlantic جۋرنالىنىڭ ءجۋرناليسى سايمون شۋستەرگە بەرگەن سۇحباتىندا مالىمدەدى، دەپ حابارلايدى "ادىرنا".
ەرماكتىڭ سوزىنشە، بۇگىندە اقىل-ەسى دۇرىس ەشبىر ادام تەرريتوريادان باس تارتۋ تۋرالى قۇجاتقا قول قويمايدى.
«زەلەنسكي پرەزيدەنت بولىپ تۇرعان كەزدە ءبىز تەرريتوريا بەرەمىز دەپ ەشكىم كۇتپەۋى كەرەك. ول مۇنداي قۇجاتقا قول قويمايدى. كونستيتۋتسيا وعان تىيىم سالادى. بۇنى ەشكىم جاساي المايدى، تەك ۋكراين كونستيتۋتسياسىنا جانە ۋكراين حالقىنا قارسى شىققىسى كەلەتىندەر بولماسا»، — دەدى.
ونىڭ ايتۋىنشا، ۋكراينا تەك سوعىسۋشى تاراپتار باقىلاۋىنداعى اۋماقتاردى بولەتىن سىزىق قاي جەردەن ءوتۋى كەرەگى جونىندە تالقىلاۋعا دايىن.
بۇعان دەيىن ۋكراينا اقش-پەن جۇرگىزگەن كەلىسسوزدەردە بەيبىت جوسپاردىڭ كوپ بولىگىن ماقۇلداعان. اقش پرەزيدەنتى دونالد ترامپتىڭ ايتۋىنشا، باستاپقىدا 28 تارماقتان تۇرعان جوسپار 22 تارماققا قىسقارعان، شەشىلمەگەن ماسەلەلەر – تەرريتوريا جانە ۋكراينانىڭ ناتو-عا كىرۋى.
اقش بيلىگى ۋكراينانىڭ 27 قاراشاعا دەيىن ۆاشينگتونمەن بەيبىت كەلىسىمگە قول قويۋىن كۇتكەن. ەرماك زەلەنسكي ترامپپەن «مۇمكىندىگىنشە تەز» كەزدەسكىسى كەلەتىنىن، بىراق ازىرگە كەزدەسۋدىڭ بولماعانىن ايتتى.
بۇعان دەيىن ۆلاديمير پۋتين ۋكراينا اسكەرلەرى قازىرگى جاۋلاپ الىنعان اۋماقتاردان شىققاندا عانا سوعىس اياقتالاتىنىن، ال شىقپاسا، رەسەي ونى «قارۋلى جولمەن ورىنداتاتىنىن» مالىمدەگەن.
