ۇلىبريتانيا پرەمەر-ءمينيسترى كير ستارمەر ۋكرايناعا اسكەري كومەكتى ارتتىرۋعا شاقىرىپ، رەسەيگە ەكونوميكالىق قىسىمدى كۇشەيتۋ قاجەتتىگىن اتاپ ءوتتى، دەپ حابارلايدى "ادىرنا" ۇلتتىق پورتالى.
كير ستارمەر رەسەي مەن ۋكراينا اراسىنداعى قاقتىعىستى بەيبىت جولمەن شەشۋگە مۇددەلى ەلدەردىڭ باسشىلارىمەن ونلاين كەزدەسۋ وتكىزەدى. جيىنعا 25-كە جۋىق ەلدىڭ وكىلدەرى، ونىڭ ىشىندە ەۋروپا ەلدەرىنىڭ باسشىلارى، ەۋروكوميسسيا باسشىلىعى، ناتو، سونداي-اق كانادا، ۋكراينا، اۋستراليا جانە جاڭا زەلانديا قاتىسادى.
بريتان پرەمەرىنىڭ ايتۋىنشا، قازىرگى كەزەڭ ناقتى ارەكەتتەر جاساۋ ءۇشىن ماڭىزدى ءسات، سەبەبى رەسەي پرەزيدەنتى ۆلاديمير پۋتين اقش-تىڭ پرەزيدەنتى دونالد ترامپتىڭ باستاماسىمەن ۇسىنىلعان شەشىمدەردى قابىلداۋدى كەيىنگە قالدىرۋ ارقىلى بىتىمگەرشىلىك پروتسەسىن سوزىپ كەلەدى.
"ەگەر رەسەي كەلىسسوزدەرگە قاتىسسا، ءبىز ۇزاق مەرزىمدى بەيبىتشىلىككە قول جەتكىزۋ ءۇشىن ىقتيمال اتىستى توقتاتۋ رەجيمىنىڭ ورىندالۋىن قامتاماسىز ەتۋگە دايىن بولۋىمىز كەرەك. ايتپەسە، قاقتىعىستى توقتاتۋ ءۇشىن ەكونوميكالىق قىسىمدى كۇشەيتۋ قاجەت", — دەدى كير ستارمەر سامميت الدىندا.
ول ۋكرايناعا اسكەري كومەكتى ۇلعايتۋ كەرەكتىگىن اتاپ ءوتىپ، بۇل ەلدىڭ قاۋىپ-قاتەرگە ءتيىمدى قارسى تۇرۋىنا مۇمكىندىك بەرەتىنىن ايتتى. سونىمەن قاتار، ۇلىبريتانيا ۋكرايناداعى تۇراقتى جانە ءادىل بەيبىتشىلىكتى ۇزاق مەرزىمدى قولداۋعا باسا نازار اۋدارادى.
كەزدەسۋ قارساڭىندا بريتان مينيسترلەرى بەلسەندى ديپلوماتيالىق كەلىسسوزدەر جۇرگىزدى. ۇلىبريتانيانىڭ قورعانىس ءمينيسترى گەرمانيا، فرانتسيا، پولشا جانە يتاليادان كەلگەن ارىپتەستەرىمەن پاريجدە كەزدەسسە، سىرتقى ىستەر ءمينيسترى G7 سىرتقى ىستەر مينيسترلەرىنىڭ كەزدەسۋىنە كاناداعا باردى.
ايتا كەتەيىك، بۇعان دەيىن رەسەي پرەزيدەنتى ۆلاديمير پۋتين دونالد ترامپتىڭ كۋرسك وبلىسىنداعى ۋكراينالىق اسكەريلەرگە قاتىستى ۇندەۋىنە بايلانىستى پىكىر بىلدىرگەن بولاتىن.
