Ukraina prezidentı ofisınıŋ basşysy Andrei Ermak Vladimir Zelenskiidıŋ beibıtşılık üşın territoriia beruge eşqaşan kelıspeitının aitty. Būl turaly ol 27 qaraşada The Atlantic jurnalynyŋ jurnalisı Saimon Şusterge bergen sūhbatynda mälımdedı, dep habarlaidy "Adyrna".
Ermaktyŋ sözınşe, bügınde aqyl-esı dūrys eşbır adam territoriiadan bas tartu turaly qūjatqa qol qoimaidy.
«Zelenskii prezident bolyp tūrǧan kezde bız territoriia beremız dep eşkım kütpeuı kerek. Ol mūndai qūjatqa qol qoimaidy. Konstitusiia oǧan tyiym salady. Būny eşkım jasai almaidy, tek ukrain Konstitusiiasyna jäne ukrain halqyna qarsy şyqqysy keletınder bolmasa», — dedı.
Onyŋ aituynşa, Ukraina tek soǧysuşy taraptar baqylauyndaǧy aumaqtardy böletın syzyq qai jerden ötuı keregı jönınde talqylauǧa daiyn.
Būǧan deiın Ukraina AQŞ-pen jürgızgen kelıssözderde beibıt jospardyŋ köp bölıgın maqūldaǧan. AQŞ prezidentı Donald Tramptyŋ aituynşa, bastapqyda 28 tarmaqtan tūrǧan jospar 22 tarmaqqa qysqarǧan, şeşılmegen mäseleler – territoriia jäne Ukrainanyŋ NATO-ǧa kıruı.
AQŞ bilıgı Ukrainanyŋ 27 qaraşaǧa deiın Vaşingtonmen beibıt kelısımge qol qoiuyn kütken. Ermak Zelenskii Tramppen «mümkındıgınşe tez» kezdeskısı keletının, bıraq äzırge kezdesudıŋ bolmaǧanyn aitty.
Būǧan deiın Vladimir Putin Ukraina äskerlerı qazırgı jaulap alynǧan aumaqtardan şyqqanda ǧana soǧys aiaqtalatynyn, al şyqpasa, Resei ony «qaruly jolmen oryndatatynyn» mälımdegen.
