ەلىمىزدە 800-گە جۋىق مەكتەپتىڭ وقۋشىسى قاشىقتان وقىتۋ فورماتىنا اۋىستىرىلدى. بۇل تۋرالى دەنساۋلىق ساقتاۋ ۆيتسە-ءمينيسترى تيمۋر سۇلتانعازيەۆ ايتتى، دەپ حابارلايدى «ادىرنا» ءتىلشىسى.
ەپيدەميولوگيالىق ماۋسىم باستالعالى بەرى ەلىمىزدە جرۆي مەن تۇماۋدىڭ 2 ميلليونعا جۋىق جاعدايى تىركەلگەن. دەنساۋلىق ساقتاۋ مينيسترلىگىنىڭ دەرەگىنشە، ناۋقاستاردىڭ 60–70 پايىزى — بالالار.
الەۋمەتتىك جەلىلەردە تۇرعىندار اۋرۋحانالارداعى ۇزىن-سونار كەزەكتەرگە شاعىمدانۋدا.
سۇلتانعازيەۆتىڭ ايتۋىنشا، مەكتەپتەر باس سانيتارلىق دارىگەردىڭ ۇسىنىمى بويىنشا ارەكەت ەتۋدە. ەگەر سىنىپتاعى وقۋشىلاردى 20%-ى اۋىرسا, ولاردى ءبىر كابينەتتەن شىعارماي، قوزعالىستى شەكتەۋ ۇسىنىلادى. 30%-دان استامى اۋىرسا, سىنىپ قاشىقتان وقىتۋعا جىبەرىلەدى.
«قازىرگى تاڭدا 13 وڭىردە وسى ءتارتىپ ەنگىزىلدى. بۇگىنگى كۇنگە دەيىن 800-دەن استام مەكتەپ 11 مىڭ سىنىپتى قاشىقتان وقۋعا جىبەردى. بۇل — شامامەن 250 مىڭ وقۋشى»، – دەدى ۆيتسە-مينيستر ءماجىلىس كۋلۋارىندا.
وتكەن اپتادا باس مەملەكەتتىك سانيتارلىق دارىگەر سارحات بەيسەنوۆا جرۆي ورشۋىنە بايلانىستى 7 وڭىردە 132 مەكتەپتىڭ 1 469 سىنىبى ونلاين فورماتقا كوشكەنىن مالىمدەگەن بولاتىن.
