اقش مەملەكەتتىك حاتشىسى ماركو رۋبيو جەنەۆاداعى ۋكرايناعا ارنالعان بەيبىت جوسپار جونىندەگى جوعارى دەڭگەيلى كەزدەسۋلەردەن كەيىن ۆاشينگتونعا ورالدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ول تەحنيكالىق دەڭگەيدەگى تالقىلاۋلار جالعاساتىنىن ايتىپ، «ماقساتىمىزعا جاقىن ارادا جەتەمىز» دەگەن پىكىر ءبىلدىردى.
اقش-تىڭ باسقا رەسمي وكىلدەرىنىڭ جەنەۆادان كەتكەن-كەتپەگەنى بەلگىسىز. بۇعان دەيىن رۋبيو اقش تاراپىنان بۇل جۇمىسقا تارتىلعان ءارتۇرلى دەڭگەيدەگى ماماندار بار ەكەنىن ايتقان ەدى.
جەكسەنبى كۇنى جەنەۆاداعى كەلىسسوزدەر اياقتالعاننان كەيىن رۋبيو سوعىستى توقتاتۋ جوسپارى بويىنشا ۋكراينالىق رەسمي تۇلعالارمەن جۇرگىزىلگەن تالقىلاۋدا «ايتارلىقتاي پروگرەسس» بولعانىن مالىمدەدى.
ء«بىز ايتارلىقتاي پروگرەسكە قول جەتكىزدىك جانە ءادىل ءارى تۇراقتى بەيبىتشىلىككە قاراي العا جىلجۋدامىز»، - دەدى ول.
ايتۋىنشا، بۇل كەزدەسۋ — ترامپ بيلىككە قايتا كەلگەلى بەرى اقش پەن ۋكراينا اراسىندا بولعان ەڭ ناتيجەلى كەلىسسوزدەردىڭ ءبىرى.
CNN-ءنىڭ حابارلاۋىنشا، تۇپكىلىكتى كەلىسىمگە قول قويۋ ءۇشىن دونالد ترامپ پەن ۋكراينا پرەزيدەنتى ۆلاديمير زەلەنسكيدىڭ ماقۇلداۋى قاجەت. سونىمەن قاتار رەسەي دە بۇل جوسپاردى قولداۋى ءتيىس.
بۇعان دەيىن شۆەيتساريا استاناسىندا ۇلىبريتانيا، فرانتسيا، گەرمانيا، ۋكراينا جانە اقش وكىلدەرىنىڭ رەسەي مەن ۋكراينا اراسىنداعى داعدارىستى رەتتەۋ پەرسپەكتيۆاسىنا قاتىستى كەلىسسوزدەرى باستالعانى حابارلانعان ەدى.
