تۇركىستان وبلىسىنىڭ العاباس اۋىلىندا بولعان توتەنشە جاعدايدان كەيىن وڭىردە ءورت قاۋىپسىزدىگىنە ارنالعان الدىن الۋ جۇمىستارى كۇشەيتىلدى. ايماق ماماندارى جىل سوڭىنا دەيىن بارلىق نىساندى قامتۋدى جوسپارلاپ وتىر، دەپ حابارلايدى "ادىرنا".
وبلىس كولەمىندە 350 مىڭنان استام ءۇي مەن نىسان بار. سونىڭ ىشىندە 139 مىڭ وبەكتىگە ورت قاۋىپسىزدىگى بويىنشا رەيد جۇرگىزىلدى.
تەكسەرۋ جەكە تۇرعىن ۇيلەردى، كوپقاباتتى ۇيلەردى، ساۋدا نىساندارىن قامتىپ وتىر.
قالعان نىسانداردى تەكسەرۋ جىل سوڭىنا دەيىن اياقتالماق.
مامانداردىڭ ايتۋىنشا، وڭىردەگى ءورتتىڭ باسىم بولىگى جەكە تۇرعىن ۇيلەردە، كولىكتەردە، ساۋدا نىساندارىندا تىركەلەدى.
ءورتتىڭ ءجيى كەزدەسەتىن سەبەپتەرى: ەلەكتر جابدىقتارىن دۇرىس پايدالانباۋ، پەشتەردى قاۋىپتى رەجيمدە جاعۋ.
وبلىس اكىمى نۇرالحان كوشەروۆ بىرقاتار تاپسىرما بەردى. اتاپ ايتقاندا: تۇرعىن ۇيلەردەگى ءورت قاۋىپسىزدىگىن كۇشەيتۋ، الەۋمەتتىك نىساندار، قوناقۇيلەر، حوستەلدەرگە ەرەكشە باقىلاۋ ورناتۋ، زاڭسىز سالىنعان عيماراتتاردى انىقتايتىن جۇمىس توبىن قۇرۋ، ءورت قاۋىپسىزدىگى رەيدتەرىن تۇراقتى جۇرگىزۋ.
پروفيلاكتيكالىق شارالار اياسىندا ماماندارعا تۇرعىندارعا ءورت حابارلاعىشتاردى ورناتۋ جونىندە كەڭەس بەرۋ، قاۋىپسىزدىك ەرەجەلەرىن بەلسەندى تۇردە ءتۇسىندىرۋ مىندەتتەلدى.
جۇمىس توبى قۇرامىنا اكىمدىك وكىلدەرى، گاز ينسپەكتسياسى، «قازاقگازايماق»، تجد قىزمەتكەرلەرى جانە وزگە دە قۇرىلىمدار كىرەدى.
