«ادىلدىك جولى» قوعامدىق بىرلەستىگىنىڭ اتقارۋشى ديرەكتورى ديدار سماعۇلوۆ سىبايلاس جەمقورلىققا قارسى ءىس-قيمىل سالاسىنداعى جەتىستىكتەرى ءۇشىن اقش مەملەكەتتىك دەپارتامەنتىنىڭ جوعارى حالىقارالىق ماراپاتىنا يە بولدى، دەپ حابارلايدى “ادىرنا” ۇلتتىق پورتالى.
سىيلىقتى اقش-تىڭ مەملەكەتتىك حاتشىسى ەنتوني بلينكەن تابىستادى. بۇل تۋرالى سماعۇلوۆ جەكە پاراقشاسىندا جازدى.
بۇل ماراپات ديدار سماعۇلوۆقا قازاقستانداعى سىبايلاس جەمقورلىق دەڭگەيىن تومەندەتۋ جانە جۇيەلى رەفورمالار جۇرگىزۋ سالاسىنداعى جۇمىستارى ءۇشىن بەرىلدى. ول بۇل جەتىستىكتى «ادىلدىك جولى» كومانداسىنىڭ وراسان زور ەڭبەگىنىڭ ناتيجەسى دەپ اتاپ ءوتتى.
“مەن ءۇشىن بۇل - ۇجىمدىق ماراپات. ءبىزدىڭ كوماندامىزدىڭ قازاقستاندا سىبايلاس جەمقورلىققا قارسى ءتيىمدى رەفورمالار ەنگىزۋ جانە قۇقىق بۇزۋشىلىققا جول بەرگەن تۇلعالاردى جاۋاپكەرشىلىككە تارتۋ جولىنداعى ەڭبەگى حالىقارالىق دەڭگەيدە مويىندالعانىنا قۋانىشتىمىن”، – دەدى ول.
سونداي-اق، ديدار سماعۇلوۆ وتباسىنا، دوستارىنا جانە ارىپتەستەرىنە قولداۋ كورسەتكەنى ءۇشىن العىسىن ءبىلدىردى.
ء“بىزدىڭ ەلىمىزدىڭ جەمقورلىققا قارسى كۇرەس سالاسىنداعى جەتىستىكتەرىنىڭ وسىنداي جوعارى دەڭگەيدە مويىندالعانى كوڭىل قۋانتادى”، – دەپ جازدى ول ءوز پاراقشاسىندا.
