بۇگىن، 19 قاراشا كۇنى پرەمەر-ءمينيستردىڭ ورىنباسارى قانات بوزىمباەۆ ۇكىمەت وتىرىسىندا تۇركىستان وبلىسى جەتىساي اۋدانى العاباس اۋىلىنداعى جەكە ۇيدە بولعان ورتكە بايلانىستى قابىلدانىپ جاتقان جەدەل شارالار تۋرالى باياندادى، دەپ حابارلايدى «ادىرنا» ءتىلشىسى.
ۆيتسە-پرەمەر كەشە ساعات 05.36-دا تۇركىستان وبلىسى جەتىساي اۋدانىنىڭ العاباس اۋىلىندا جەكە تۇرعىن ۇيدە ءورت شىققانىن ايتتى. ەكى قاباتتى ءۇي تولىعىمەن ورتكە ورانىپ، شاتىرى ءىشىنارا وپىرىلعان. وقيعا ورنىنا توتەنشە جاعدايلار مينيسترلىگىنىڭ كۇش-قۇرالدارى دەرەۋ جىبەرىلدى، ءورت ساعات 07.22-دە سوندىرىلگەن.
ول وقيعا ورنىندا تەرگەۋ شارالارى جۇرگىزىلىپ، ءورتتىڭ سەبەبى انىقتالىپ جاتقانىن مالىمدەدى.
بوزىمباەۆتىڭ ايتۋىنشا، ازىرگە قىلمىستىق قۇرام جوق. ء«ورت قاۋىپسىزدىگى تالاپتارىن بۇزۋ» بابى بويىنشا سوتقا دەيىنگى تەرگەۋ باستالعان (قىلمىستىق كودەكستىڭ 292-بابىنىڭ 3-بولىگى).
ء«سىزدىڭ تاپسىرماڭىز بويىنشا كەشە مەن ۇكىمەتتىك كوميسسيانىڭ وتىرىسىن وتكىزدىم، جەرلەۋ ءراسىمىن ۇيىمداستىرۋ جانە قازا تاپقاندار مەن زارداپ شەككەندەردىڭ وتباسىلارىنا كومەك كورسەتۋ، ءورتتىڭ تۋىنداۋ سەبەپتەرىن انىقتاۋ، سونداي-اق وسىنداي جاعدايلاردىڭ الدىن الۋ شارالارىن جۇرگىزۋ بويىنشا بىرقاتار تاپسىرما بەردىم»، -دەپ باياندادى ۆيتسە-پرەمەر.
ەسكە سالايىق، ءورت ورنىندا 12 ادام قازا تاپقان ەدى، ولاردىڭ 9-ى – بالا. 3 ادام زارداپ شەكتى، ولار قازىر جەتىساي اۋداندىق ورتالىق اۋرۋحاناسىنىڭ جانساقتاۋ بولىمىندە جاتىر.
