اتىراۋدا يانا لەگكوديموۆانىڭ ولىمىنە قاتىستى قىلمىستىق ىسكە نۇكتە قويىلدى. بۇگىن مامانداندىرىلعان اۋدانارالىق قىلمىستىق سوت ايىپتالۋشىلار ريزۋان قايىرجانوۆ پەن التىنبەك كاتيموۆكە قاتىستى ۇكىمىن جاريالادى، دەپ حابارلايدى "ادىرنا".
سوت شەشىمىمەن قايىرجانوۆ پەن كاتيموۆ قر قىلمىستىق كودەكسىنىڭ 99-بابى 2-بولىگىنىڭ 7 جانە 8-تارماقتارىندا كوزدەلگەن اسا اۋىر قىلمىس جاساعانى ءۇشىن كىنالى دەپ تانىلىپ، ءومىر بويىنا باس بوستاندىعىنان ايىرىلدى.
"جازا مەرزىمى ولاردىڭ ۇستالعان كۇنى – 2024 جىلعى 22 قازاننان باستاپ ەسەپتەلەدى. قر قك-ءنىڭ 62-بابى 3-بولىگىنىڭ 1-تارماعىنا سايكەس، قايىرجانوۆ پەن كاتيموۆتىڭ ۇكىم زاڭدى كۇشىنە ەنگەنگە دەيىن قاماۋدا بولعان ۋاقىتى جازانىڭ ءبىر كۇنىنە ءبىر كۇن ەسەبىمەن تولىقتاي قوسىلادى", - دەدى سۋديا.
سوت ازاماتتىق تالاپتى دا قارادى. مارقۇمنىڭ اناسى گالينا لەگكوديموۆانىڭ ازاماتتىق تالابى ءىشىنارا قاناعاتتاندىرىلىپ، ايىپتالۋشىلاردان ماتەريالدىق شىعىن رەتىندە 1 955 070 تەڭگە وندىرىلەدى.
سونىمەن قاتار سوتتالۋشىلار قايىرجانوۆ پەن كاتيموۆتەن جابىرلەنۋشى گالينا لەگكوديموۆانىڭ پايداسىنا ارقايسىسىنان 15 000 000 تەڭگە كولەمىندە مورالدىق وتەماقى ءوندىرۋ تۋرالى شەشىم قابىلداندى.
مەملەكەت كىرىسىنە سوت قايىرجانوۆ پەن كاتيموۆتەن 21 517 تەڭگە كولەمىندە مەملەكەتتىك باجدى ءوندىرۋدى مىندەتتەدى.
ايىپتالۋشىلارعا سوت ۇكىمىنىڭ تالاپتارىن ورىنداۋ ءۇشىن ەكى اي مەرزىم بەلگىلەندى.
بۇعان دەيىن وتكەن سوت وتىرىسىندا مەملەكەتتىك ايىپتاۋشى ءىستىڭ اۋىرلىعىن، قىلمىستىڭ قوعامعا قاۋىپتىلىگىن اتاپ ءوتىپ، ايىپتالۋشىلارعا ەڭ قاتاڭ جازا قولدانۋدى سۇراعان بولاتىن. پروكۋرور ەكى كۇدىكتىگە دە ءومىر بويىنا باس بوستاندىعىنان ايىرۋ جازاسىن تاعايىنداۋدى ۇسىنعان ەدى. سونىمەن قاتار يانا لەگكوديموۆانى ءولتىردى دەپ ايىپتالعانداردىڭ جازاسى قاتاڭداعان ەدى.
