بۇگىن ءماجىلىس دەپۋتاتتارى ەلىمىزدە لگبت ناسيحاتىنا تىيىم سالۋدى كوزدەيتىن تۇزەتۋدى ماقۇلدادى، دەپ حابارلايدى «ادىرنا» ءتىلشىسى.
دەپۋتاتتار ەكىنشى وقىلىمدا بىردەن توعىز زاڭعا وزگەرىستەر ەنگىزۋدى كوزدەيتىن تۇزەتۋلەردى قولدادى. قۇجاتتا ەندى بۇقارالىق اقپارات قۇرالدارى مەن ينتەرنەت كەڭىستىگىندە گوموسەكسۋاليزمگە قاتىستى كەز كەلگەن اقپاراتتى تاراتۋعا تىيىم سالىناتىنى ايتىلعان. بۇل تۇزەتۋ «مۇراعات ءىسى ماسەلەلەرى جونىندەگى» زاڭ جوباسىنا ەنگىزىلگەن.
ءماجىلىس دەپۋتاتى ەلنۇر بەيسەنباەۆتىڭ ايتۋىنشا، زاڭ جوباسى قوعامدا بالالار مەن جاسوسپىرىمدەردى تسيفرلىق كەڭىستىكتەگى تەرىس اسەرلى كونتەنتتەن قورعاۋ ماسەلەسىنە بايلانىستى قابىلدانعان.
«قوعامدا بالالار مەن جاسوسپىرىمدەردى ينتەرنەتتەگى جاعىمسىز كونتەنتتەن قورعاۋعا قاتىستى الاڭداۋشىلىق كۇشەيىپ كەلەدى. وسىعان بايلانىستى زاڭ جوباسىنا قوعامدىق ورىنداردا پەدوفيليا مەن ءداستۇرلى ەمەس جىنىستىق باعداردى ناسيحاتتاۋعا تىيىم سالاتىن تۇزەتۋلەر ەنگىزىلدى»، – دەدى دەپۋتات.
بەيسەنباەۆتىڭ سوزىنشە، قازىرگى تاڭدا وسكەلەڭ ۇرپاق جەلىدە وتباسى، يماندىلىق جانە بولاشاق تۋرالى تۇسىنىگىنە كەرى اسەر ەتەتىن اقپاراتتارعا ءجيى تاپ بولادى.
ء«بىز بالالاردى مۇنداي زاڭسىز كونتەنتتەن قورعاۋ ارقىلى ولاردىڭ قاۋىپسىزدىگى مەن پسيحيكالىق ساۋلىعىن ساقتاۋدى ماقسات ەتەمىز»، – دەپ قوستى ول.
