TikTok 2025 جىلدىڭ ەكىنشى توقسانىندا قازاقستاندىق قولدانۋشىلاردىڭ 1,4 ميلليوننان استام بەينەروليگىن جويدى، دەپ حابارلايدى «ادىرنا» ءتىلشىسى.
جويىلعان كونتەنتتىڭ 99,1 پايىزى پرواكتيۆتى تۇردە, ياعني پايدالانۋشىلار شاعىمدانباي تۇرىپ انىقتالعان. ال 96,7 پايىزى جاريالانعاننان كەيىنگى العاشقى 24 ساعات ىشىندەجويىلعان. بۇل كورسەتكىش — الەمدىك ورتاشا دەڭگەيدەن جوعارى.
TikTok قاۋىمداستىق قاۋىپسىزدىگىن قامتاماسىز ەتۋ ءۇشىن تاۋلىك بويى جۇمىس ىستەيتىن مودەراتسيا جۇيەسىن جانە الەمنىڭ تۇكپىر-تۇكپىرىندە ەڭبەك ەتەتىن كاسىبي ساراپشىلاردىڭ تاجىريبەسىن پايدالانادى. پلاتفورما زاماناۋي تەحنولوگيالار ارقىلى بالالار مەن جاسوسپىرىمدەرگە ارنالعان قاۋىپسىز جانە شىعارماشىلىق ورتا قۇرۋدى كوزدەيدى.
الەم بويىنشا 2025 جىلدىڭ ەكىنشى توقسانىندا 190 ميلليوننان استام بەينەروليكەر ەرەجەبۇزۋشىلىق ءۇشىن جويىلعان. ونىڭ 99,1 پايىزى — پرواكتيۆتى تۇردە، ال 94,4 پايىزى — جاريالانعاننان كەيىنگى ءبىر تاۋلىك ىشىندە وشىرىلگەن.
سونىمەن قاتار TikTok تىكەلەي ەفيرلەردىڭ قاۋىپسىزدىگىن كۇشەيتىپ, مونەتيزاتسيا ەرەجەلەرىن بۇزعان كونتەنتكە قارسى شارالاردى ارتتىرعان. 2025 جىلدىڭ ەكىنشى توقسانىندا بۇكىل الەم بويىنشا 2,3 ميلليوننان استام ەفير مەن 1 ميلليوننان استام ەفير اۆتورىنا ەسكەرتۋ مەن دەمونەتيزاتسيا شارالارى قولدانىلعان.
كومپانيا مالىمەتىنشە، بۇل كورسەتكىشتەر TikTok مودەراتسيا جۇيەسىنىڭ تيىمدىلىگىن جانە كونتەنت قاۋىپسىزدىگىنە باعىتتالعان جاڭا شارالاردىڭ ناتيجەلىلىگىن دالەلدەيدى. پلاتفورما الداعى ۋاقىتتا دا تىكەلەي ەفيرلەردىڭ قاۋىپسىزدىگى مەن اشىقتىعى جونىندە ەسەپتەردى تۇراقتى تۇردە جاريالاۋدى جالعاستىرادى.
