"ۇلىمنىڭ كوزى ەدى..." كىسى قولىنان قازا تاپقان وقۋشىنىڭ تۋىستارى ادىلدىكتى تالاپ ەتۋدە

9-سىنىپ وقۋشىسى مەيىرجان نۇرجانۇلىنىڭ ءولىمى قوعامدى ءدۇر سىلكىندىردى، دەپ حابارلايدى "ادىرنا" ۇلتتىق پورتالى.

قارالى وتباسىنىڭ ايتۋىنشا، 15 جاستاعى جەتكىنشەكتى قۇرداستارى مولا ماڭىنا اپارىپ، سوققىعا جىققان. جۇرەك تۇسىنان تيگەن اۋىر سوققىدان مەيىرجان سول جەردە كوز جۇمعان. قايعىلى وقيعا تۇركىستاندا بولعان.

“بۇلار 3-4 بالانى قويىپ قويعان شەتتەرىنەن. ءسويتىپ جاڭاعى تورتەۋى ۇرىپ شىققان عوي. ەكى رەت اينالدىرىپ شىققان 4 بالا. ەكى سوققىدان ەسەپتەگەندە 8 سوققى ەكەن. مەنىڭ ءىنىمنىڭ جۇرەگىنەن ۇرا بەرگەن. تەك جۇرەكتەن ۇرعان. جۇرەگى جارىلىپ كەتكەن. ۇيقى بەزى ەزىلىپ كەتكەن. سول كەزدە ءتىل تارتپاي كەتكەن”، – دەيدى مارقۇمنىڭ اعاسى باۋىرجان نۇرجانۇلى.

مەيىرجان وتباسىنداعى ءۇش بالانىڭ كەنجەسى بولعان. اكەسى ەرتە قايتىس بولىپ، اناسى مەن اجەسىنىڭ قولىندا وسكەن. جاقىندارىنىڭ ايتۋىنشا، ول فيزيكا مەن ماتەماتيكاعا بەيىم، ۇقك مامانى بولۋدى ارمانداعان، ءتىپتى اجالىنىڭ الدىندا بايقاۋدا جەڭىسكە جەتكەن.

اجەسىنىڭ سوزىنشە، نەمەرەسى ءبىراز ۋاقىت بويى الىمجەتتىك كورىپ كەلگەن.

“ۇلىمنىڭ كوزى بولىپ قالعان مەيىرجانىمدى قۇرداستارى جاۋىزدىقپەن ءولتىردى.

باستىق بالالارى ايتادى ەكەن. "بۇگىن ساعات پالەن ۋاقىتتا 15 مىڭ جينا نەمەسە 20 مىڭ جينا"دەيدى. بىرەۋدە بار، بىرەۋدە جوق. سول ءبىر بالا اكەلمەسە ءبارىن ۇرىپ شىعادى ەكەن. وسىدان 10 كۇن بۇرىن شاي ءىشىپ وتىرساق، مىنا جەرى كوكبەڭبەك. "اشەيىن ۇرىپ الدىم" دەيدى. مەنىڭ بالامدى قورقىتىپ جۇرگەنىنە 3-4 اي بولىپتى”، – دەيدى مارقۇمنىڭ اجەسى نەسىپگۇل تۇتقابەكوۆا.

وتباسىنىڭ ايتۋىنشا، الىمجەتتىك كورسەتكەن بالالار ءار ءتۇرلى مەكتەپتىڭ وقۋشىلارى، ولاردىڭ اراسىندا مەيىرجاننىڭ سىنىپتاسى دا بار. الايدا مەكتەپ اكىمشىلىگى تەرگەۋگە بايلانىستى تۇسىنىكتەمە بەرۋدەن باس تارتقان.

“قازىر قىلمىستىق ءىس تىركەلدى. سول سەبەپتى قوسىمشا اقپاراتتى بەرۋگە بولمايدى”، – دەدى بالا قۇقىقتارى جونىندەگى ۋاكىل دينارا زاكيەۆا.

قارا جامىلعان وتباسى تەرگەۋدىڭ ءادىل جۇرگىزىلىپ، كۇدىكتىلەردىڭ جازاسىز قالماۋىن تالاپ ەتىپ وتىر.