9-synyp oquşysy Meiırjan Nūrjanūlynyŋ ölımı qoǧamdy dür sılkındırdı, dep habarlaidy "Adyrna" ūlttyq portaly.
Qaraly otbasynyŋ aituynşa, 15 jastaǧy jetkınşektı qūrdastary mola maŋyna aparyp, soqqyǧa jyqqan. Jürek tūsynan tigen auyr soqqydan Meiırjan sol jerde köz jūmǧan. Qaiǧyly oqiǧa Türkıstanda bolǧan.
“Būlar 3-4 balany qoiyp qoiǧan şetterınen. Söitıp jaŋaǧy törteuı ūryp şyqqan ǧoi. Ekı ret ainaldyryp şyqqan 4 bala. Ekı soqqydan eseptegende 8 soqqy eken. Menıŋ ınımnıŋ jüregınen ūra bergen. Tek jürekten ūrǧan. Jüregı jarylyp ketken. Ūiqy bezı ezılıp ketken. Sol kezde tıl tartpai ketken”, – deidı marqūmnyŋ aǧasy Bauyrjan Nūrjanūly.
Meiırjan otbasyndaǧy üş balanyŋ kenjesı bolǧan. Äkesı erte qaitys bolyp, anasy men äjesınıŋ qolynda ösken. Jaqyndarynyŋ aituynşa, ol fizika men matematikaǧa beiım, ŪQK mamany boludy armandaǧan, tıptı ajalynyŋ aldynda baiqauda jeŋıske jetken.
Äjesınıŋ sözınşe, nemeresı bıraz uaqyt boiy älımjettık körıp kelgen.
“Ūlymnyŋ közı bolyp qalǧan Meiırjanymdy qūrdastary jauyzdyqpen öltırdı.
Bastyq balalary aitady eken. "Bügın saǧat pälen uaqytta 15 myŋ jina nemese 20 myŋ jina"deidı. Bıreude bar, bıreude joq. Sol bır bala äkelmese bärın ūryp şyǧady eken. Osydan 10 kün būryn şai ışıp otyrsaq, myna jerı kökbeŋbek. "Äşeiın ūryp aldym" deidı. Menıŋ balamdy qorqytyp jürgenıne 3-4 ai bolypty”, – deidı marqūmnyŋ äjesı Nesıpgül Tūtqabekova.
Otbasynyŋ aituynşa, älımjettık körsetken balalar är türlı mekteptıŋ oquşylary, olardyŋ arasynda Meiırjannyŋ synyptasy da bar. Alaida mektep äkımşılıgı tergeuge bailanysty tüsınıkteme beruden bas tartqan.
“Qazır qylmystyq ıs tırkeldı. Sol sebeptı qosymşa aqparatty beruge bolmaidy”, – dedı Bala qūqyqtary jönındegı uäkıl Dinara Zäkieva.
Qara jamylǧan otbasy tergeudıŋ ädıl jürgızılıp, küdıktılerdıŋ jazasyz qalmauyn talap etıp otyr.
