رەسەي پرەزيدەنتىنىڭ ءباسپاسوز حاتشىسى دميتري پەسكوۆ كسرو مەملەكەتتىك قاۋىپسىزدىك قىزمەتى جانە بولشەۆيزم قوزعالىسىمەن بايلانىستى اۋلەتتەن شىققان. بۇل تۋرالى رەسەي بيلىگىندەگى تۋىستىق بايلانىستاردى اشكەرەلەيتىن «پروەكت» باسىلىمىنىڭ جاڭا زەرتتەۋىندە ايتىلعان، دەپ حابارلايدى «ادىرنا» ءتىلشىسى.
ماتەريالدا پەسكوۆتىڭ ءوز تەگىن ونداعان جىلدار بويى جاسىرىپ كەلگەنى جازىلعان. رەسمي ءومىربايانىندا ول تەك كەڭەس ديپلوماتى سەرگەي پەسكوۆتىڭ ۇلى رەتىندە كورسەتىلگەن، ال اناسى جايلى ەش دەرەك كەلتىرىلمەيدى.
شىن مانىندە، ونىڭ اناسى — نادەجدا زەۆينا، كەڭەستىك نومەنكلاتۋرا وكىلى، 1918 جىلى اتىلعان 26 باكيندىك كوميسساردىڭ ءبىرى ياكوۆ زەۆيننىڭ نەمەرەسى. ياكوۆ زەۆين قازا تاپقاننان كەيىن ونىڭ جەسىرىنە لەنيننىڭ ءوزى ماسكەۋدەن پاتەر بەرگەن.
ال پەسكوۆتىڭ ارعى اجەسى نادەجدا كرۋپسكايامەن بىرگە حالىق اعارتۋ كوميسسارياتىندا قىزمەت ەتىپ، قىزىل ارميا قاتارىنداعى پارتيا مۇشەلەرىن تازارتۋ جۇمىستارىنا قاتىسقان.
كەيىننەن ونىڭ ۇلى، ياعني پەسكوۆتىڭ اتاسى ماركسيزم-لەنينيزم ينستيتۋتى ديرەكتورىنىڭ ورىنباسارى قىزمەتىن اتقارعان. ال اناسى، جۋرناليستەردىڭ بولجامىنشا، كەڭەستىك ارنايى قىزمەت ورگاندارىندا جۇمىس ىستەگەن بولۋى مۇمكىن.
دميتري پەسكوۆتىڭ اكەسى سەرگەي پەسكوۆ ازيا جانە افريكا ەلدەرى ينستيتۋتىن ءتامامداپ، كوپ جىلدار بويى تاياۋ شىعىستا قىزمەت ەتكەن. رەسمي تۇردە ول «دوستىق قوعامدارىندا» جۇمىس ىستەگەن، بىراق بۇل ۇيىمدار سۋىق سوعىس كەزىندە كەڭەس اگەنتتەرى ءۇشىن ءجيى قولدانىلعان بۇركەمەلەۋ بولعان.
زەرتتەۋ مالىمەتىنشە، دميتري پەسكوۆتىڭ مانسابى دا تۋىستىق جانە نەكە بايلانىستارىنىڭ ارقاسىندا وربىگەن. ونىڭ العاشقى جۇبايى — مارشال سەميون بۋديوننىيدىڭ نەمەرەسى بولعان. بۇل نەكە جاس ديپلوماتتى شەتەلدىك ىسساپارعا جىبەرۋگە مۇمكىندىك بەرگەن.
«اجىراسقاننان كەيىن پەسكوۆ ەكىنشى رەت رەسەيلىك ديپلوماتتىڭ قىزى ەكاتەرينا سولوتسينسكاياعا ۇيلەنەدى. ايەلىنىڭ اكەسى كەيىن ونى كرەملدە جۇمىس ىستەۋگە ۇسىنعان. سول ۋاقىتتان باستاپ پەسكوۆ ۆلاديمير ءپۋتيننىڭ ىشكى شەڭبەرىنىڭ مۇشەسىنە اينالىپ، پرەزيدەنتتىڭ ءباسپاسوز حاتشىسى قىزمەتىنە تاعايىندالعان»،—دەلىنگەن حابارلامادا.
