امەريكالىق اكتريسا جانە بۇۇ باس كوميسسارىنىڭ بوسقىندار ءىسى جونىندەگى باسقارماسىنىڭ ىزگى نيەت ەلشىسى اندجەلينا دجولي قايىرىمدىلىق ۇيىمى Legacy of War Foundation ارقىلى ۋكرايناداعى نيكولاەۆ پەن حەرسون قالالارىنا بارعانى تۋرالى ايتتى. ول بۇل تۋرالى ءوزىنىڭ Instagram پاراقشاسىندا جازدى، دەپ حابارلايدى “ادىرنا”.
دجولي مەديتسينا قىزمەتكەرلەرى، جەرگىلىكتى تۇرعىندار جانە ەرىكتىلەرمەن كەزدەسكەن.
«نيكولاەۆ پەن حەرسون تۇرعىندارى ءار كۇندە قاۋىپ-قاتەردە ءومىر سۇرسە دە، بەرىلۋگە دايىن ەمەس. الەمدەگى ۇكىمەتتەر بەيبىت تۇرعىنداردى قورعاۋدان باس تارتقان كەزدە، ولاردىڭ كۇشى مەن ءبىر-بىرىنە كورسەتكەن قولداۋى ۇلكەن قۇرمەتكە لايىق. قارۋلى قاقتىعىستىڭ ءتورت جىلعا جۋىق ۋاقىتقا سوزىلۋىنا قاراماستان، ولاردىڭ شارشاعانى انىق، بىراق تاباندىلىعى دا ايقىن. وتباسىلار قاۋىپسىزدىك، بەيبىتشىلىك پەن ءومىرىن قايتا قالپىنا كەلتىرۋ مۇمكىندىگىن قالايدى»، دەپ جازدى اكتريسا.
ايتا كەتەيىك، بۇعان دەيىن ونىڭ ۋكرايناعا ەسكەرتپەي بارعانىن حابارلادىق.
جەرگىلىكتى باق-تىڭ حابارلاۋىنشا، اكتريسا ۋكرايناعا گۋمانيتارلىق ميسسيامەن بارعان. ول مەديتسينالىق مەكەمەلەرگە سوعىپ، قوعامدىق ۇيىم وكىلدەرىمەن كەزدەسكەن. سونداي-اق الەۋمەتتىك جەلىدە ءدجوليدىڭ ۋكراينالىق بالالارمەن اڭگىمەلەسىپ وتىرعان ءساتى تاسپالاعان سۋرەت تە تاراعان.
حەرسونعا بارا جاتقان جولدا اكتريسا نيكولاەۆتاعى اسكەري جيناقتاۋ جانە الەۋمەتتىك قولداۋ ورتالىعىنا سوققان. ۋكراينالىق «پوليتيكا سترانى» باسىلىمى مەن ودەسساداعى Telegram-ارنالاردىڭ حابارلاۋىنشا، جول ۇستىندە ونىڭ كۇزەتشىسىن توقتاتىپ، اسكەري قىزمەتكە جارامدى ەكەنىن انىقتاعان. الايدا بۇل وقيعاعا اكتريسا دا، رەسمي ورگاندار دا ناقتى تۇسىنىكتەمە بەرمەدى.
ەسكە سالساق، اكتريسا بۇعان دەيىن دە ۋكرايناعا ساپار جاساعان. ول 2022 جىلى ءساۋىر ايىنىڭ سوڭىندا لۆوۆ قالاسىنا بارىپ، تەمىرجول ۆوكزالىنداعى بوسقىنداردى قابىلداۋ ورتالىعىنا، ينتەرناتقا بارىپ، اسكەري ارەكەتتەردەن زارداپ شەككەن بالالارمەن كەزدەستى. جەرگىلىكتى تۇرعىندار ءدجوليدىڭ كافەگە كىرگەن ءساتىن ۆيدەوعا تۇسىرگەن.
