Qazaqstan halyqaralyq deŋgeide aviasiialyq qauıpsızdık salasynda ülken jetıstıkke jettı. Azamattyq aviasiianyŋ halyqaralyq ūiymy (İKAO) elımızdıŋ körsetkışın 95,7 paiyz dep baǧalady. Būl – älemdık ortaşa deŋgeiden äldeqaida joǧary nätije, dep habarlaidy “Adyrna”.
Qazaqstan Respublikasy Kölık ministrlıgınıŋ habarlauynşa, İKAO sarapşylarynyŋ tekseruı 2025 jylǧy 30 tamyz ben 15 qyrküiek aralyǧynda jürgızılgen.
Derek boiynşa, älemdık ortaşa körsetkış 72 paiyzdy, al Europadaǧy ortaşa deŋgei şamamen 88 paiyzdy qūraidy. Qazaqstan būl körsetkışpen aimaq elderınıŋ köbınen ozyp, Katar men Bırıkken Arab Ämırlıkterı siiaqty aviasiia salasynda aldyŋǧy qatardaǧy memleketterge jaqyndady.
Vedomstvonyŋ mälımetınşe, qazırgı kezde:
- Äzerbaijan – 74,66%,
- Özbekstan – 85,47%,
- Qyrǧyzstan – 85,76%,
- Gruziia – 89,75%,
- Belarus – 91,85%,
- Resei – 94,14% körsetkış körsetken.
Al körşıles aimaqtarda BAÄ – 98,4%, Katar – 96,72%, Saud Arabiiasy – 94,41% deŋgeiınde tūr.
Osylaişa, Qazaqstan İKAO-nyŋ Euro-Aziattyq aimaǧyndaǧy (EUR/NAT) aviasiialyq qauıpsızdık boiynşa eŋ joǧary nätije körsetken elderdıŋ bırı atandy.
Būǧan deiın Qazaqstannyŋ körsetkışı 83 paiyz deŋgeiınde bolǧan. Qazır ol şamamen 13 tarmaqqa ösıp, jaŋa rekord ornatty. Būl jetıstık aviasiia salasyndaǧy erejelerdı jaŋartu, mamandardy daiarlau jäne äuejailardaǧy qauıpsızdık baqylauyn küşeitu jūmystarynyŋ nätijesı bolyp otyr.
Sala mamandarynyŋ aituynşa, mūndai joǧary körsetkışter Qazaqstannyŋ halyqaralyq bedelın arttyryp qana qoimai, AQŞ-pen tıkelei äue qatynastaryn aşuǧa, sondai-aq şeteldık aviakompaniialardy köbırek tartuǧa mümkındık beredı.
Aita ketsek, 2025 jyldyŋ mausym aiynda Kölık ministrlıgı Qazaqstandaǧy tek segız äuejaidyŋ ǧana İKAO-nyŋ joǧary standarttaryna tolyq säikes keletının habarlaǧan bolatyn.
