قىزىلوردا قالاسىندا مەكتەپ وقۋشىسى جاڭا ويىن ويلاپ تاپتى، دەپ حابارلايدى "ادىرنا" ۇلتتىق پورتالى.
نازارباەۆ زياتكەرلىك مەكتەبىنىڭ 9-سىنىپ وقۋشىسى گاۋحار مارات قازاق حاندىعى ءداۋىرىن جاڭاشا سيپاتتا تانىتاتىن «التىن تاق» تانىمدىق ۇستەل ويىنىن قۇراستىردى. جوبا تاريح ءپانىنىڭ مۇعالىمى ايگۇل زەينۋللانىڭ جەتەكشىلىگىمەن جۇزەگە اسقان.
"بۇل ويىندى ءبىزدىڭ مەكتەپتە 7-سىنىپتا، ال وزگە مەكتەپتەردە 6-سىنىپتا قولدانۋعا بولادى. قازىرگى كۇنى بالالار تاريحي وقيعالار مەن تۇلعالاردى شاتاستىرىپ الادى. ساباقتى تانىمدىق ويىنعا ۇشتاستىرۋ وسى ولقىلىقتىڭ ورنىن تولتىرۋعا مۇمكىندىك بەرەدى. بولاشاقتا ويىننىڭ ديزاينىن جەتىلدىرىپ، حاندارمەن قاتار باتىرلار، جىراۋلار مەن الاش قايراتكەرلەرىن دە ەنگىزىپ، باسقا مەكتەپتەرگە تاراتۋدى جوسپارلاپ وتىرمىز", – دەيدى ايگۇل زەينۋللا.
وقۋشىنىڭ ايتۋىنشا، ويىن ەكى تاقتا مەن 24 بەلگىدەن تۇرادى. ءار بەلگىدە حاندار بەينەلەنگەن.
"بۇل ويىن تاريحي تۇلعالاردىڭ ءرولىن باعالاۋ ارقىلى وقۋشىلاردىڭ تانىمدىق قىزىعۋشىلىعىن ارتتىرادى", – دەيدى گاۋحار مارات.
