الماتىدا «Qazaqstan» تەلەراديوكورپوراتسياسى مەن «BEU» راديوسىنىڭ «Beu Awards-2023» زاماناۋي مۋزىكا جۇلدەسىنىڭ جەڭىمپازدارىن ماراپاتتاۋ شاراسى ءوتتى.
شارادا Darkhan Juzz اتىمەن تانىمال بولعان قازاقستاندىق مۋزىكانت دارحان جۇنىسبەكوۆتىڭ«Aue» البومى «ۇزدىك البوم» اتاندى. جۇلدە ءانشىنىڭ وتباسى مۇشەلەرىنە تابىستالدى. «Aue» - «Ozen» مۋزىكالىق لەيبلىنىڭ قولداۋىمەن جارىققا شىققان ءانشىنىڭ اياقتالماي قالعان جوباسى.
ودان بولەك، مارحابا ءسابيدىڭ «تىم بولەك» ءانى «ۇزدىك ءان»، اقەركە امالياتتىڭ ورىنداۋىنداعى ەربولات قۇدايبەرگەنوۆتىڭ «مەن قازاقپىن» ءانى تەلەۆيزيالىق جۇلدەنىڭ «ۇزدىك كاۆەر» اتالىمىن يەلەندى. «ۇزدىك ورىنداۋشى» نوميناتسياسى «تۇمانداۋ» ءانى ءۇشىن ءانشى ايريگە جانە «اسىقپا» ءانى ءۇشىن Mona Songz اتىمەن تانىمال وتاندىق ءانشى ماناربەك جۇماتايعا بەرىلدى. «Ninety One» توبى جۇلدەنىڭ «ۇزدىك توپ» اتالىمى بويىنشا ماراپاتتالدى.«ءبارى ءوز قولىڭدا» قازاقستاندىقفيلمىنىڭ ساۋندترەگى- ميراس جۇگىنىسوۆتىڭ ورىنداۋىنداعى «ساياحات» ءانى «ۇزدىك ساۋندترەك» اتالىمى بويىنشا داۋىس بەرۋشىلەر ىقىلاسىنا يە بولدى.
«وردا» توبىنىڭ مۇشەسى، ءانشى، پروديۋسەر ەربولات بەدەلحان مەن «Ozen» مۋزىكالىق لەيبلىنىڭ نەگىزىن قالاۋشى ايزاتۋللا حۋسسەين ۇيىمداستىرۋشىلار تاراپىنان جۇلدەنىڭ «قازاقستان زاماناۋي مۋزىكاسىنىڭ دامۋىنا قوسقان ۇلەسى ءۇشىن» جاڭا اتالىمى بويىنشا ماراپاتتالدى.
جەڭىمپازداردى انىقتاۋ«BEU» راديوسىنىڭ تىڭدارماندارى اراسىندا الەۋمەتتىك جەلىلەردە داۋىس بەرۋ ارقىلى جۇرگىزىلدى. جۇلدە ماقساتى – قازاق زاماناۋي مۋزىكا وكىلدەرى اراسىندا ءتۇرلى جانرلار مەن ءستيلدى تانىمال ەتۋ. «Qazaqstan» تەلەراديوكورپوراتسياسىنىڭ بەينەمۇراعاتىندا ءداستۇرلى جانە زاماناۋي ءان وكىلدەرىنىڭ «التىن قورى» ساقتالعان. ال «BEU» راديوسىنىڭ فونوتەكاسىندا زاماناۋي مۋزىكا وكىلدەرىنىڭ 3000-عا جۋىق تۋىندىسى بار.
جوبانىڭ تەلەۆيزيالىق نۇسقاسى جۋىردا «Qazaqstan» ارناسىنىڭ ەفيرىنەن كورسەتىلەدى.
«ادىرنا» ۇلتتىق پورتالى
