گيزا پيراميدالارىنىڭ ماڭىندا ورنالاسقان ەگيپەتتىڭ بايتاق مۋزەيى اشىلدى، دەپ حابارلايدى «ادىرنا» ءتىلشىسى.
سالتاناتتى ءراسىم 1 قاراشادا ءوتتى. ءىس-شاراعا ءارتۇرلى ەلدەن كەلگەن لاۋازىمدى تۇلعالار قاتىستى. ولاردىڭ اراسىندا گەرمانيانىڭ فەدەرالدىق پرەزيدەنتى فرانك-ۆالتەر شتاينمايەر بار.
500 مىڭ شارشى مەتر اۋماقتى الىپ جاتقان بۇل مۇراجايدىڭ كولەمى لۋۆردان ەكى ەسە ۇلكەن. ونىڭ كوللەكتسياسىندا 70 مىڭنان استام ەكسپونات بار. سونىڭ ىشىندە بۇرىن كوپشىلىككە كورسەتىلمەگەن جاس پەرعاۋىن تۋتانحاموننىڭ قابىرىنەن تابىلعان اسىل قازىنالار دا بار.
جوبا العاش رەت 1992 جىلى جاريالانعانىمەن، ناقتى قۇرىلىس جۇمىستارى تەك 2005 جىلى باستالعان بولاتىن. 2012 جىلى اشىلۋى جوسپارلانعان جوبا قۇرىلىس شىعىندارىنىڭ ارتۋىنا، ساياسي تۇراقسىزدىققا، COVID-19 پاندەمياسىنا جانە ايماقتىق قاقتىعىستارعا بايلانىستى بىرنەشە رەت كەيىنگە شەگەرىلگەن.
ايتا كەتەيىك، 20 جىل بويى سالىنعان مەگاجوباعا شامامەن 1,2 ميلليارد اقش دوللارى قۇيىلعان. قارجىنىڭ نەگىزگى بولىگى جاپون حالىقارالىق ىنتىماقتاستىق اگەنتتىگىنىڭ نەسيەسى ارقىلى قامتاماسىز ەتىلگەن.
