قازاقستاننىڭ بالا قۇقىقتارى جونىندەگى ۋاكىلى دينارا زاكيەۆا 6-سىنىپ وقۋشىسىنىڭ قايعىلى قازاسىنان كەيىن سىنعا قالعان، دەپ حابارلايدى "ادىرنا" ۇلتتىق پورتالى.
جەلىدە الماتى وبلىسىندا 6-سىنىپ وقۋشىسى ءوز-وزىنە قول جۇمسادى دەگەن مالىمەت تارادى.
«نەمولچي» قورىنىڭ جەتەكشىسى دينا سمايلوۆانىڭ ايتۋىنشا، بۇل وتباسىنىڭ جاعدايى تۋرالى بۇعان دەيىن مەملەكەتتىك ورگاندار مەن پوليتسياعا حابارلانعان. قور باسشىسى بۇل جاعدايعا قاتىستى قاجەتتى شارالار قابىلدانباعانىن ايتقان.
دينارا زاكيەۆا الەۋمەتتىك جەلىدەگى جازباسىندا اتالعان وتباسى جونىندە وزىنە ەشقانداي اقپارات تۇسپەگەنىن ايتتى.
بۇل جاعدايعا بالالار ومبۋدسمەنى پىكىر بىلدىرگەن.
«ومبۋدسمەن ءاربىر پوليتسيا نەمەسە قورعانشىلىق ورگانى قىزمەتكەرىنىڭ ارەكەتىن جەكە قاداعالاي المايدى. پوليتسيانىڭ جۇمىسىن ءىىم، ال قورعانشىلىق قىزمەتىن اكىمدىكتەر باقىلايدى»، — دەپ جازدى ول. سونداي-اق، ول قور تاراپىنان دا اقپار بولماعانىن اتاعان.
ال "نەمولچي" قورىنىڭ باسشىسى ومبۋدسمەننىڭ ارەكەتىن سىنادى.
«دينارا زاكيەۆا ءبىزدىڭ قورعا ايىپ تاعۋدا، بىراق ءوزى بارلىق جاعدايدى باقىلاي المايتىنىن مويىندايدى. ەگەر باقىلاۋ بولماسا، دەمەك، مەملەكەتتىك ورگانداردىڭ جۇمىسى ءالسىز، ال ومبۋدسمەن جۇيەلى جۇمىستى جولعا قويا المادى. ونىڭ ۇستىنە، ءبىزدىڭ نومىرلەرىمىزدى ول ەكى جىلدان بەرى بۇعاتتاپ تاستاعان، وتىنىشتەرگە جاۋاپ بەرمەيدى، تەك رەزونانس بولعان كەزدە عانا ارەكەت ەتەدى»، — دەدى سمايلوۆا.
ونىڭ سوزىنشە، زاكيەۆا 6 ميلليارد تەڭگە كولەمىندە قارجى الىپ، 112 وتباسىن قولداۋ ورتالىعىن اشقان.
