اقش پرەزيدەنتى دونالد ترامپ رەسەي پرەزيدەنتى ۆلاديمير ءپۋتيننىڭ «بۋرەۆەستنيك» قاناتتى زىمىرانىن سىناۋ تۋرالى مالىمدەمەسىن «ورىنسىز» دەپ باعالادى، دەپ حابارلايدى "ادىرنا" ۇلتتىق پورتالى Reuters اگەنتتىگىنە سىلتەمە جاساپ.
ترامپتىڭ ايتۋىنشا، پۋتين زىمىران سىناۋمەن ەمەس، ۋكرايناداعى سوعىستى توقتاتۋمەن اينالىسۋى كەرەك.
«ول سوعىستى توقتاتۋى ءتيىس. ءبىر اپتاعا عانا سوزىلۋى ءتيىس سوعىس ءتورتىنشى جىلعا ۇلاستى. وسىنى شەشكەنى دۇرىس»، - دەدى ترامپ.
ەسكە سالا كەتەيىك، بۇعان دەيىن رەسەي قارۋلى كۇشتەرى باس شتابىنىڭ باستىعى ۆالەري گەراسيموۆ ۆلاديمير پۋتينگە يادرولىق قوزعالتقىشى بار «بۋرەۆەستنيك» قاناتتى زىمىرانىنىڭ ءساتتى سىناقتان وتكەنىن حابارلاعانىن جازعان ەدىك.
پۋتين بۇل سىناقتى تابىستى دەپ اتاپ، مۇنداي «بىرەگەي قارۋ الەمدە ەشكىمدە جوق» ەكەنىن مالىمدەگەن.
21 قازاندا وتكەن سىناق بارىسىندا زىمىران شامامەن 15 ساعات بويى اۋەدە بولىپ، 14 مىڭ شاقىرىم قاشىقتىقتى باعىندىرعانى ايتىلادى. رەسەي پرەزيدەنتىنىڭ ارنايى وكىلى كيريلل دميتريەۆ سىناق ناتيجەلەرى تۋرالى اقپاراتتىڭ اقش اكىمشىلىگىنىڭ جوعارى باسشىلىعىنا جەتكىزىلگەنىن حابارلاعان.
