كاسپي تەڭىزىنىڭ دەڭگەيىنىڭ تومەندەۋىنەن ەڭ كوپ زارداپ شەگىپ وتىرعان — قازاقستان اكۆاتورياسى. «قازگيدرومەت» ماماندارىنىڭ بولجامىنشا، عاسىردىڭ ورتاسىنا قاراي تەڭىز دەڭگەيى تاعى ەكى مەترگە تومەندەۋى مۇمكىن، دەپ حابارلايدى “ادىرنا” ۇلتتىق پورتالى Lada.kz سايتىنا سىلتەپ.
عالىمداردىڭ ايتۋىنشا، تەڭىز دەڭگەيىنىڭ تومەندەۋىنە كليماتتىق وزگەرىستەر مەن ادام ارەكەتى اسەر ەتۋدە.
زەرتتەۋلەر كورسەتكەندەي، 2050 جىلعا قاراي كاسپي تەڭىزىنىڭ دەڭگەيى بالتىق بيىكتىك جۇيەسى بويىنشا مينۋس 32,4–34 مەترگە دەيىن ءتۇسۋى ىقتيمال.
تاريحي دەرەكتەرگە سايكەس:
- 1940–1977 جىلدارى تەڭىز جىلىنا 4 سم تومەندەگەن;
- 1978–1995 جىلدارى جىلىنا 13 سم كوتەرىلگەن;
- 1996–2023 جىلدارى جىلىنا 8 سم تومەندەگەن.
2006 جىلدان بەرى كاسپي دەڭگەيى 2 مەترگە ازايعان.
2024 جىلى تەڭىزدىڭ سولتۇستىك-شىعىس بولىگىندە دەڭگەي 22 سم، ال شىعىس بولىگىندە 29 سم تومەندەگەن.
قىركۇيەك ايىنداعى دەرەك بويىنشا، تەڭىزدىڭ ەڭ جوعارى دەڭگەيى يگولكينسكايا بانكادا – 147 سم، ال ەڭ تومەنگىسى قۇرىق ماڭىندا – مينۋس 195 سم بولدى.
ورتاشا دەڭگەي – مينۋس 29,18 مەتر (بالتىق جۇيەسى بويىنشا).
