2026 جىلدىڭ 1 قاڭتارىنان باستاپ وزبەكستاندا قۇرىلىس سالاسىنا جاڭا تالاپ ەنگىزىلەدى. ەندى ەلدەگى بارلىق تۇرعىن ءۇي كەشەندەرىنىڭ اتاۋلارى تەك مەملەكەتتىك – وزبەك تىلىندە جازىلۋى ءتيىس. بۇل نورما 22 قازاندا قابىلدانعان ۇكىمەت قاۋلىسىندا كورسەتىلگەن، دەپ حابارلايدى «ادىرنا».
جاڭا تالاپتىڭ ماقساتى — وزبەك ءتىلىنىڭ مارتەبەسىن كۇشەيتۋ
قۇجاتتا بۇل وزگەرىس قۇرىلىس سالاسىندا مەملەكەتتىك ءتىلدىڭ قولدانىسىن ارتتىرۋ جانە ۇلتتىق ءتىل ساياساتىن نىعايتۋعا باعىتتالعانى ايتىلعان.
تالاپ تەك تۇرعىن ءۇي كەشەندەرىنىڭ اتاۋىنا عانا ەمەس، قۇرىلىسپەن بايلانىستى بارلىق اقپاراتتىق ماتەريالدارعا قاتىستى. ەندى:
- قۇرىلىس نىساندارىنداعى تاقتايشالار مەن باننەرلەر،
- عيمارات تولقۇجاتتارى،
- ۋاقىتشا قورشاۋلارداعى جازبالار،
- قۇرىلىس پاسپورتتارى — بارلىعى وزبەك تىلىندە جازىلۋى مىندەتتى.
سونىمەن قاتار، 2025 جىلدىڭ باسىنان باستاپ ەلدەگى جارنامالىق ماتىندەر مەن حابارلاندىرۋلار دا تەك مەملەكەتتىك تىلدە جاريالانۋعا ءتيىس.
ۇكىمەت قاۋلىسىندا كورسەتىلگەندەي، قۇرىلىسقا رۇقسات الۋ، تەحنيكالىق باقىلاۋ جۇرگىزۋ جانە نىساندى پايدالانۋعا قابىلداۋ سياقتى بارلىق راسىمدەرگە قاتىستى قۇجاتتار مەملەكەتتىك تىلدە ازىرلەنۋى قاجەت.
قازىرگى تاڭدا وزبەكستاندا كوپتەگەن قۇرىلىس كومپانيالارى تۇرعىن ءۇي كەشەندەرىنە اعىلشىن تىلىندە اتاۋ بەرىپ كەلگەن. مىسالى: New National Way, Favorit Residence, Kompakt House, Newport, Regnum Plaza جانە تاعى باسقا اتاۋلار ءجيى كەزدەسەدى.
بىرنەشە كۇن بۇرىن وزبەكستان پرەزيدەنتى شاۆكات ميرزيوەۆ مەملەكەتتىك ءتىلدى دامىتۋ جونىندەگى جاڭا قاۋلىعا قول قويعان بولاتىن. قۇجاتتا وزبەك ءتىلىن قوعامنىڭ بارلىق سالاسىندا كەڭىنەن پايدالانۋ، ونى زاماناۋي تەحنولوگيالارمەن ۇشتاستىرۋ جانە وقىتۋ ساپاسىن ارتتىرۋ شارالارى قامتىلعان.
2026 جىلدان باستاپ بارلىق مەملەكەتتىك ورگاندار مەن ايماقتىق اكىمدىكتەردە (حوكيمياتتاردا) رۋحانيات جانە مەملەكەتتىك ءتىل جونىندەگى كەڭەسشى لاۋازىمى ەنگىزىلەدى.
بۇدان بولەك، ەلدە جاساندى ينتەللەكت نەگىزىندەگى وزبەك ءتىلىن قولداۋ پلاتفورماسى ازىرلەنەدى. 1 جەلتوقسانعا دەيىن جاڭا تەرميندەردى تىركەۋ مەن تالقىلاۋعا ارنالعان ۆەب-رەسۋرس جاساۋ بويىنشا عىلىمي جوباعا كونكۋرس جاريالانباق.
